Анализи

МОТ: Поради пандемијата, загубени се околу 300 милиони работни места

Меѓународната организација на трудот на Обединетите нации (МОТ) проценува дека пандемијата во вториот квартал од оваа година ќе изгуби скоро 11 проценти од работното време низ целиот свет. Тоа се 305 милиони работни места со полно работно време, според тековниот извештај под наслов „КОВИД 19 и пазарот на трудот“, кој го презентираше МОТ во Женева.

Особено погодени се млади луѓе на возраст меѓу 15 и 24 години. За нив не беше лесно дури и пред пандемијата: невработеноста во таа возрасна група е над просекот, а многумина работат со помалку пари, без договори и социјално осигурување, честопати на локалните пазари или во услужните дејности. „Овие млади сега ќе бидат погодени побрзо и потешко од другите“, рече Гај Рајдер, генерален директор на МОТ. Дури и оние што сè уште имаат работа изгубиле четвртина од работното време.

Меѓународната организација на трудот наведува дека младите луѓе биле погодени трипати од кризата. Тие ги губат работните места, нивното образование или понатамошно тренирање е прекинато или отежнато, а за оние кои сега завршуваат училиште и бараат работа – нема работа.

Изгубена генерација?

„Сите тестови го покажуваат следново: ако луѓето не можат да работат долго време на почетокот на нивниот професионален живот, тогаш тоа предизвикува последици кои често траат со децении“, рече Рајдер за ДВ.
„Никогаш повеќе не го надополнуваат тоа, никогаш повеќе не наоѓаат нормална професионална обука. Затоа сега постои опасност од „локдаун-генерација“, рече Рајдер.

Младите жени, вели тој, се особено погодени затоа што честопати работат во угостителство или трговија.

„Дури и пред пандемијата, тие беа запоставени и сега нивната состојба е особено опасна“, рече Рајдер. Со цел да се намалат штетите и да се спречи цела генерација да расте од занемарување на долг рок, Меѓународната организација на трудот бара владите да дејствуваат „брзо и далекусежно“.

„Ќе се соочиме со огромен социјален ризик ако не се грижиме за овие млади луѓе во пост-пандемиската обнова“, рече Рајдер, објаснувајќи дека тоа би можело да се направи преку некаква форма на специјални програми за образование или гаранции за работа.

Ќе биде поскапо

Единственото прашање е кој треба да плати за сето тоа. Откако многу земји веќе позајмија многу за да ја надминат кризата, Европската унија сега разговара за пакетот за стимулирање на економијата во висина од 750 милијарди евра.

Во меѓувреме, многу други земји со многу поограничени ресурси, како што се земји од Латинска Америка, се меѓу земјите во кои коронавирусот во моментов се шири особено брзо. Ситуацијата може да се влоши доколку се зголеми и бројот на заразени лица во Африка.

Особено опасно за Африка

„Шест од десет луѓе во светот заработуваат за живот на црниот пазар на трудот“, вели шефот на МОТ, Рајдер. „Во субсахарска Африка, дури девет од десет луѓе или повеќе“.

Ако стопанскиот живот сопре заради пандемија, тоа може за многумина да биде опасно по живот. „Карактеристика на меѓународната реакција досега до оваа криза е недостаток на солидарност и помош“, рече Рајдер. Тоа, додава тој, ќе мора да се промени, бидејќи животот на стотици милиони луѓе е во прашање.

Тежок баланс

Меѓународната организација на трудот исто така укажува на важноста на екстензивно тестирање на корона и следење на ланецот на инфекција. Доколку е направено доволно во тој поглед, тогаш ќе бидат потребни помалку изолирање и забрани за движење, со што ќе се заштити пазарот на трудот, вели Рајдер. Азиските земји како што се Тајван и Јужна Кореја на тој начин успеаја да го ограничат ширењето на инфекцијата без целосно суспендирање на работата во многу индустрии.

На крајот, шефот на МОТ, Рајдер, смета дека Германија не реагирала претерано во борбата против короната, ниту дека и наштетила непотребно на нејзината економија.

„Напротив, верувам дека Германија успеа да одржи баланс во целост“, заклучува Гај Рајдер.

Поврзани вести

Дилемата на Фолксваген: Бизнис или морал?

Влатко Зорба

Зошто бизнисите не можат сами да се справат со климатските промени?

Влатко Зорба

Ако сака да биде лидер, Европа мора да ја смени стратегијата кон Азија и САД

Влатко Зорба

Земјите во развој ќе дознаат дали Кина може да дејствува како вистински светски лидер

Влатко Зорба

На повидок ли е нов биткоин балон?

Stefanija Kuzmanovska

ДВ: Тесла е џуџе кое брка гиганти, но прашањето е колку долго

Влатко Зорба