Хроника

Засекогаш протерани од земјава двајца криумчари на мигранти

Криумчарите на мигранти по признавање на вина, осудени и ќе бидат протерани од земјава
Скопје, 21 февруари 2020 (МИА) – По поднесен обвинителен акт од страна на Основното јавно обвинителство за гонење на организиран криминал и корупција за предметот во кој се обвинети две лица, по потекло од Република Гана, дека сториле кривично дело „криумчарење на мигранти“, денеска во Основниот кривичен суд – Скопје беше одржано рочиште. По воведните зборови на надлежниот обвинител, обвинетите, германски државјанин и државјанка на Италија, ја признаа вината, информираат од Јавното обвинителство.

Судот, како што е посочено, донесе пресуда со која на обвинетите им е изречена алтернативна мерка – условна осуда на казна затвор во траење од две години која нема да се изврши доколку во период од пет години не сторат друго кривично дело, воедно во текот на денешниот ден на обвинетите ќе им биде укината мерката притвор и ќе бидат протерани засекогаш од Република Северна Македонија. При одмерувањето на казната судот, како што е наведено во соопштението, ги имаше предвид олеснителните околности дека обвинетите не се сторители на други кривични дела и против нив не се водат други постапки во други земји, дека двајцата се вработени во земјите чии што се државјани, како и тоа дека првообвинетиот е татко на малолетно дете, а второобвинетата е болна. Надлежниот обвинител од Основното јавно обвинителство за гонење на организиран криминал и корупција се согласи со изречената пресуда.

Имено, на почетокот на јануари годинава, обвинетите со намера илегално да пренесат тројца мигранти се упатиле со патничко моторно возило со германски регистарски таблички во Грција. За непречено поминување, за мигрантите обезбедиле јавни исправи – лични карти од Европска Унија и им ги дале на рака.

На граничниот премин „Богородица“ при контрола од страна на полициски службеник мигрантите се легитимирале со холандска, шведска и германска лична карта. Тројцата мигранти кои исто така потекнуваат од Гана, платиле вкупно 500 евра за патни трошоци, а според договорот остатокот од по 1000 евра од лице требало да го исплатат по пристигнување на крајната дестинација – Австрија.

Поврзани вести

Татко осомничен за полов напад врз неговите три деца во Битола заработи притвор од 30 дена

МВР: Приведени 56 лица не го почитувале полицискиот час

Берта Китинска

Двајца повредени во сообраќајка на патот Тетово-Скопје

Александар Тодески

Возачот што прегази полицаец доби кривична пријава

Вооружен инцидент во амбуланта: Ѝ се заканил на лекарка со пиштол

Красниќи во бегство

Влатко Зорба