Регион

Хрватска меѓу трите најпогодени земји како резултат на падот на туризмот

Светскиот туризам би можел да загуби над 1.200 милијарди американски долари или 1,5 проценти од глобалниот БДП по скоро четири месеци пауза поради коронавирус, а меѓу 15-те земји чиј БДП би можел да „претрпи“ најмногу поради загубите во туризмот, Хрватска е трета, наведува, меѓудругото, УНКТАД во нов извештај.

Во новиот извештај за економските последици од пандемијата „Ковид-19“ врз туризмот, објавен оваа недела, телото на ОН за трговија и развој, исто така, презентира проценки за загуби во три „сценарија“ со оглед на времетраењето на прекините во туризмот – за четири, осум и 12 месеци.

„Доколку продолжи нарушувањето на меѓународниот туризам, за осум месеци глобалната загуба во тој сектор би можела да се зголеми на 2.200 милијарди долари, што е околу 2,8 проценти од глобалниот БДП, додека во најпесимистичкото сценарио, доколку прекинот трае 12 месеци, загубите би можеле да ги надминат и 3,3 трилиони долари, или 4,2 проценти од БДП“, проценува УНКТАД.

Тие потсетуваат на големата важност на уделот на секторот за патувања и туризам во глобалниот БДП, како и дека туризмот е столбот на економиите на многу земји и „животот“ на милиони луѓе во светот, кои во последните 20 години имаат повеќе од трипати поголеми приходи од туризам, со околу 500 милијарди до 1.600 милијарди долари.

„Ковид-19 ги ​​стопираше долгогодишните позитивни трендови во светскиот туризам, предизвикувајќи сериозни економски последици низ целиот свет. Иако туризмот полека се рестартира во поголем број на земји, многумина сè уште се во застој и за многумина, како што се малите острови и земјите во развој, колапс во туризмот значи и колапс на нивните развојни можности“, предупреди директорот на меѓународната трговија на УНКТАД, Памела Коук-Хамилтон во извештајот.

Анализирајќи ги ефектите од загубите во туризмот врз нејзиното учество во националниот БДП, УНКТАД проценува дека Јамајка и Тајланд би можеле да претрпат најголема загуба на учеството на туризмот во БДП, со 11 и 9 проценти, соодветно. Во Хрватска, таа загуба, според нивните, како што велат, „умерени проценки“, би можела да биде 8 проценти, по што следат Португалија со загуба од 6 проценти, и Доминиканската Република со 5 проценти.

Меѓу 15-те најпогодени земји се Кенија, Мароко, Грција, Маурициус, Сенегал, Ирска, Египет, Јужна Африка, Малезија и Шпанија, а УНКТАД предупредува дека туристичкиот сектор исто така ќе почувствува притисок во многу богати земји. Тие споменуваат, како што велат, популарни европски и северноамерикански дестинации, вклучително и Франција, Италија и Соединетите држави, кои исто така предвидуваат загуби од милијарди долари како резултат на драматичниот пад на меѓународниот туризам.

„Загубите во туризмот предизвикани од коронавирусот негативно влијаат на другите економски сектори кои снабдуваат добра и услуги на патниците додека се на одмор, така што УНКТАД повикува на зголемена социјална заштита во погодените земји за да се спречат најтешките економски тешкотии за луѓето и заедниците зависни од туризмот“, велат од таа организација.

Повикувајќи ги владите да ги заштитат работниците во туризмот, тие исто така советуваат дека, доколку некои компании веројатно нема да закрепнат, субвенциите за плати треба да бидат дизајнирани за да им помогнат на работниците да се преселат во нова индустрија.

„Владите треба да им помогнат на туристичките компании кои се соочуваат со ризик од банкрот, како хотели, авиокомпании и други, а еден начин на финансиско олеснување е заемите или грантовите со ниски каматни стапки“, се наведува во извештајот на УНКТАД.

Поврзани вести

Словенија: Две милијарди евра помош за граѓаните и компаниите, платите на државните функционери се намалуваат за 30 отсто

Нема договор за формирање влада на Косово

13 лица починале од коронавирус во последниве 24 часа во Србија

Влатко Зорба

Трамп именува специјален претставник за преговорите меѓу Белград и Приштина

Влатко Зорба

Австрија со предупредување кон своите граѓани: Избегнувајте патувања во земјите од Западен Балкан

Влатко Зорба

Казна од 150 евра за неносење маска во Грција