Дури 775 соби, кои повеќето хотели во светот ги немаат, кино, базен, тениско игралиште, тајна врата, градини и езеро се нешто што ретко кој ќе остави рамнодушен. Но, живеењето во Бакингемската палата не е толку спектакуларно како што звучи.
Како што откриваат добро упатени извори, веројатно вработени во кралското семејство кои деновите ги поминуваат во самата палата, таа е полна со глувци, а не помага тоа што внатре во ѕидовите не е студено, туку ледено, бидејќи кралот Чарлс III нареди температурата да се одржува на 19 степени, откако сметките за парно биле „чудесни“. Кога никој не престојува таму, парното се исклучува на 16 степени, додека за време на викендот е целосно исклучено.
Но, ако мислевте дека тоа е единственото нешто што ги спречува членовите на кралското семејство да ги преместат куферите таму, ќе се лажете.
Бакингемската палата во никој случај не е безбедна за здравјето на кралот и кралицата, како и на остатокот од семејството, бидејќи отстранувањето на азбестот започна само пред неколку години и сè уште трае. Покрај тоа, постои можност парчиња од ѕидот да паднат врз минувачите. Токму тоа и се случи во 2007 година на принцезата Ана, која за влакно избегна сериозни повреди.
Поради сето ова, не е чудно што кралот Чарлс и кралицата Камила не размислуваат да ги пакуваат куферите и да се преселат од Кларенс Хаус во Бакингемската палата во 2027 година, кога конечно ќе заврши реновирањето на истата, вредна 369 милиони фунти. Покрај сите овие „надворешни фактори“, тоа што станот на монархот се простира над канцеларијата не им оди во прилог, па затоа нема многу простор за приватност.
И покрај неговиот луксуз, изглед и големи размери, никој од денешната генерација не сака да живее таму, што не треба да изненадува, бидејќи кралицата Елизабета Втора и принцот Филип исто така не покажаа наклонетост за палатата.