Шоуто на комичарот Џими Кимел се враќа во етерот откако беше привремено суспендирано минатата недела, предизвикувајќи голема дебата за слободата на говорот во Соединетите Американски Држави и притисокот што го врши администрацијата на претседателот Доналд Трамп врз медиумите, објавија светските агенции. Веста за враќањето на шоуто ја објави Дизни, кој е сопственик на ABC, на кој се емитува шоуто.
„Последните неколку дена ги поминавме во длабоки разговори со Џими, и по тие дискусии, донесовме одлука да го обновиме денес“, се вели во соопштението на Дизни.
ABC минатата среда објави дека го суспендира на неодредено време Кимел, кој е меѓу критичарите на Доналд Трамп.
Непосредно пред да се донесе оваа одлука, Кимел ја обвини американската десница дека го експлоатира убиството на про-Трамп инфлуенсерот и поткастер Чарли Кирк за политички цели. Коментарите на Кимел предизвикаа гнев кај Брендан Кар, раководител на Американскиот радиодифузен орган, кој го нарече однесувањето на Кимел скандалозно и се закани дека ќе ги одземе лиценците на медиумите што ја емитуваат неговата програма.
Кимел ја налути десницата кога рече дека убиецот на Чарли Кирк, Тајлер Робинсон, потекнува од републиканско семејство и кога сугерираше дека Робинсон го мотивирал своето злосторство со омразата што ја всадил Кирк.
Во соопштението, Дизни рече дека одлуката за привремено суспендирање на шоуто на Кимел е донесена за да се избегне влошување на напнатата ситуација во емотивен момент за земјата.