Во денешно време, ниту една платформа не е безбедна од напади на малициозен софтвер, вклучително и Android, кој во последно време е честа мета на хакери и сајбер криминалци. Од тие причини, се препорачува да инсталирате квалитетен антивирусен софтвер на вашиот уред со Android, а експертите за безбедност на порталот AV-TEST спроведоа ново истражување за да откријат кои во моментов се најдобри.
Како што беше потврдено, решенијата на „трети страни“ се подобри од оние што ги нуди Google, дури и оние кои се бесплатни. AV-TEST спроведе истражување на 17 антивирусни решенија за Android и го тестираше нивниот „енџин“ во три различни категории под имињата – заштита, перформанси и корисност, и секоја може да освои максимум 6 поени.
Според резултатите од истражувањето, 11 антивируси добиле максимум 18 поени и тоа: AhnLab V3 Mobile Security, Avast Mobile Security, AVG Antivirus Free, Avira Antivirus Security, Bitdefender Mobile Security, G Data Mobile Security, Kaspersky Internet Security for Android, McAfee Мобилна безбедност, NortonLifeLock Norton 360, Protected.net Total AV и Trend Micro Mobile Security.
Google Play Protect што го имате вградено во вашиот телефон се покажа како најлош и успеа да задоволи само во однос на перформансите, додека доби нула поени во однос на заштитата и корисноста. Од ова е јасно дека заштитата на Google Play Protect само по себе не е доволна од малициозни фактори, затоа би ви препорачале да изберете едно од наведените поуспешни решенија.