Словенија денеска позајми 500 милиони евра на меѓународниот финансиски пазар преку државни обврзници со рок на доспевање од 60 години, што е најдолго доспевање досега, објави словенечкото Министерство за финансии.
„Издадени се 60-годишни обврзници во вредност од 0,5 милијарди евра, со принос до достасување од 0,70 проценти и каматна стапка од 0,6875 проценти, споредлива со условите за позајмување за земји како Франција и Белгија“, соопшти Министерството за финансии.
Ова е втора емисија на државни обврзници оваа година, откако Словенија издаде 10-годишни обврзници во вредност од 1,75 милијарди евра на почетокот на јануари, за прв пат со негативна каматна стапка, и ја надополни емисијата на 30-годишни обврзници за уште 250 милиони евра.
Вкупно, Словенија обезбеди 2,9 милијарди евра долгорочно финансирање за потребите на државниот буџет под поволни услови оваа година, во согласност со програмата за финансирање на Владата.
Новото задолжување, меѓу другото, отплати 1,65 милијарди евра веќе достасан долг и камата, а дополнителни 1,95 милијарди евра долг доспеваат до крајот на оваа година, соопшти Министерството за финансии.
Според последните проценки на Министерството, словенечкиот јавен долг ќе достигне 37,7 милијарди евра или 82,4 проценти од БДП, до крајот на годината поради зголемените буџетски потреби, но цената на каматата на тој долг ќе падне за 0,1 процентен поен, до 1,6 проценти од БДП, што се должи на поволниот кредитен рејтинг и историски ниските каматни стапки.