Се надеваме ќе ви се допадне рецептот за овој турски специјалитет – менемен.
Покрај тоа што е едноставен за правење, комбинацијата од пиперки, домати, со додавање на јајца и зачини, сето тоа подготвено за помалку од 30 минути, е идеално решение за оброк кога сакате свеж, вкусен зеленчук и имате малку време.
Во Турција обично се служи како појадок, но подеднакво е вкусен и за ручек, за вечера, па дури и за ужина.
Состојки:
* 4 пиперки во различни бои
* 3 големи домати
* 2 главици кромид
* 1 лута пиперка
* 3-4 јајца
* 20 мл маслиново масло
* 20 гр путер
* малку шеќер
* сол и бибер по вкус
* сецкан лист од магдонос
Подготовка:
Добро исчистете го и измијте го зеленчукот. Кромидот ситно исечкајте го. Излупете ги доматите и исечете ги на помали коцки.
Пиперката исечкајте ја на коцки, а од лутата пиперка исчистете ги семките и исечете ги на прстени.
Во длабока тава ставете ги путерот и маслото да се загреат, па додадете го кромидот и пропржете го додека не стане стаклен.
Потоа додадете пиперка, малку сол и поклопете да се динста додека не омекне.
По пиперките, доаѓаат доматите во кои исто така ќе додадете малку шеќер и повторно поклопете се да се динста додека не омекне. Кога ќе се распадне, со вилушка изгмечете ги малку доматите.
Искршете јајце во омекнатиот зеленчук, додадете бибер и сол по вкус, а потоа измешајте сè за да се соедини. Оставете сè уште неколку минути за да се „крчка“.
Топлиот менемен посипете го со сечкан магдонос и послужете со домашен леб.
На здравје!