Шпанскиот малопродажник на облека „Индитекс“, сопственик на „Зара“, во средата објави дека ја затворил фискалната 2020 година со 70 проценти помал нето профит поради затворањето на продавниците во многу земји за да се запре пандемијата на коронавирус.
Во фискалната година што заврши во јануари, нето добивката на Индитекс лани падна на 1,1 милијарда евра.
Приходите паднаа за 28 проценти, на 20,4 милијарди евра, откако скокот од 77 проценти во продажбата преку Интернет делумно ги неутрализира негативните ефекти од пандемијата, а резултатите беа поддржани од брзото закрепнување на Кина.
Компанијата донекаде ја намали штетата со строгото управување со синџирот на снабдување, намалувајќи ги залихите за девет проценти од претходната година, и покрај нестабилната продажба.
Кон крајот на годината, за време на сезоната на празници за купување, многу влади во Европа повторно ги заострија мерките за спречување на нов бран пандемија, така што нето профитот на „Индитекс“ беше преполовен на 435 милиони евра. Приходот потона за една четвртина, на 6,3 милијарди евра.
На крајот на јануари, на крајот на фискалната година, околу 30 проценти од продавниците на „Индитекс“ беа затворени, а до почетокот на оваа недела тој удел беше преполовен. Компанијата очекува дека скоро сите продавници ќе бидат отворени до 12 април.
Во Соединетите држави и Европа, враќањето на нивото од пред-пандемијата е попречено од блокадите што се воведуваат оваа година, како и од бавното вакцинирање на граѓаните во многу земји.
Компанијата планира да затвори вкупно 1.200 продавници до крајот на годината и да се сврти кон инвестиции на познати локации од каде што ќе може да им служи на онлајн, но и на физичките клиенти. Досега затворија 751 продавница.