Кинескиот трговец на мало „Алибаба“ забележа профит од 79 милијарди јуани (12,2 милијарди долари или 10,1 милијарди евра) во последниот квартал од минатата година, што е за 52% повеќе од истиот период претходната година.
Компанијата продолжува да го користи силниот раст на трговијата преку Интернет поради пандемијата Ковид-19.
Компанијата објави скок на приходите од 37 проценти за кварталот што заврши во декември од претходната година. Тоа беше подобро отколку што очекуваа аналитичарите, според прогнозите на „Refinitiv“.
Основните операции на електронска трговија на „Алибаба“ профитираа за време на пандемијата на коронавирус, бидејќи луѓето се свртеа кон купување преку Интернет за да ги купат најважните работи без да ги напуштат своите домови. И последниот квартал вклучуваше голем настан за продажба за „Денот на самците“, кој донесе десетици милијарди долари минатата година.
„Благодарение на брзото закрепнување на кинеската економија, „Алибаба“ имаше уште еден многу здрав квартал“, рече Даниел Жанг, претседател и извршен директор на „Алибаба“, во соопштението за јавноста.
Но, силните приходи можеби не се доволни за да се смири загриженоста на инвеститорите за можниот притисок на кинеските власти врз империјата создадена од Џек Ма.
Ма, кој беше ко-основач на „Алибаба“ пред повеќе од две децении, гледаше како неговите бизниси привлекуваат гнев на владините кругови во Пекинг во последните месеци. Деновиве, тој исто така беше „фатен“ од државните медиуми: во вторникот, „Шангај Секјурити Журнал“ ги пофали истакнатите кинески деловни лидери во написот за „претприемачкиот дух“. Во текстот се споменуваат технолошките претприемачи како што се Пони Ма на „Тенсент“ и Рен Женгфеи на „Хуавеи“, но тоа не беше случај со Ma.
Да потсетиме, Ма неодамна се појави во јавноста по неколкумесечно мистериозно „исчезнување“ што предизвика разни шпекулации.