Скот Адамс, авторот на популарниот стрип „Дилберт“, почина од рак на простата, на 68 години.
Неговата смрт ја објави денеска неговата поранешна сопруга, Шели Мајлс, во неговиот пренос во живо „Училиштето Скот Адамс“.
„Ако го читате ова, работите не се одвиваа добро за мене. Моето тело попушти пред мојот мозок. Имав неверојатен живот, му дадов сè што имав… Бидете корисни и знајте дека ве сакав сите до самиот крај“, напишал Скот Адамс во својата проштална изјава, која ја пренесе „Дедлајн“.
ТМЗ вчера објави дека Адамс неодамна бил примен во палијативна нега откако неговата состојба одеднаш се влошила.
Скот Адамс, роден на 8 јуни 1957 година, во Виндам, Њујорк, откри во мај дека има рак, наведувајќи: „Имам ист рак како Џо Бајден. Исто така, имам рак на простата кој се проширил на моите коски, но го имам подолго од него – подолго отколку што тој призна дека го има“, рекол Адамс, додавајќи „почит и сочувство“ кон поранешниот претседател и неговото семејство.
„Ако се прашувате дали ќе се опоравам, одговорот е не – само ќе се влоши. Сега има само еден начин да се одвива ова“, рекол тој.
„Дилберт“, стрип што го сатиризираше канцеларискиот живот следејќи ги понижувањата на работното место на инженерот Дилберт, првпат беше објавен во 1989 година и создаде бројни книги, игри, производи и анимирана ТВ серија на УПН, која се емитуваше две сезони почнувајќи од 1999 година.
На својот врв, „Дилберт“ беше објавен во 2.000 весници во 65 земји.