Осомничениот демнач кој тврдел дека Шакира е „негова сопруга“ бил уапсен пред нејзиниот дом во Мајами, откако наводно ѝ испраќал подароци, вклучувајќи вино, чоколади и играчки.
Даниел Џон Волтиер бил приведен во понеделникот и обвинет за следење, стои во извештајот за апсењето.
Според „Дејли Мејл“, 56-годишниот маж од Ел Пасо, Тексас наводно споделил повеќе објави на социјалните мрежи за Шакира, кои нејзиниот тим за безбедност ги предал на властите на 3 јануари. Тој се појавил пред куќата на пејачката само пет дена подоцна, со такси, во 12 часот и 45 минути, а набрзо бил уапсен.
На Волтиер му бил одреден притвор и се појавил на суд во вторникот, каде рекол дека не може да ја исполни наредбата да се држи подалеку од колумбиската пејачка.
„Таа е моја сопруга“, му рекол тој на судијата, истакнувајќи дека „постојано разговара со неа“.
Инаку, не е јасно дали Шакира била во куќата кога пристигнал осомничениот и набрзо бил приведен.
Тимот за безбедност на Шакира му кажал на Волтиер да престане да ѝ испраќа подароци и да објавува детали за неа на интернет. Но, тие се загрижиле кога забележале објава на Инстаграм во која тој наводно се фалел дека отишол во домот на Шакира во Мајами Бич и споделил фотографија од визит-карта од мотел во Флорида.