Доналд Трамп смета дека државата треба да добие „значаен дел“ од продажната цена на „ТикТок“ во САД, а доколку не се продаде до 15 септември, како што се шпекулира, тој вели дека ќе ја забрани таа апликација во својата земја.
Според Ројтерс, Трамп сакал да го забрани „ТикТок“ од минатата сабота, но тој очигледно го сменил ставот по разговорите со извршниот директор на „Мајкрософт“. Агенцијата понатаму објави дека некои инвеститори ја проценуваат вредноста на договорот за купопродажба на „TikTok“ на околу 50 милијарди долари.
– Реков ако го купите „ТикТок“, без оглед на цената што ќе ја добие сопственикот, и претпоставувам дека тоа е во суштина Кина, дека значителен дел од цената ќе мора да се даде на Министерството за финансии на САД, затоа што дозволуваме да се случи оваа зделка – рече Трамп, пренесува Ројтерс.
Николас Клин, адвокат на „ДЛА Пајпер“, вели дека владата генерално нема овластување да учествува во приватна зделка преку американскиот комитет за странски инвестиции (CFIUS), кој е меѓусекторски комитет одговорен за контрола на одредени странски инвестиции во САД.
Затоа, не е јасно како американската влада ќе добие дел од купопродажната цена. „Мајкрософт“ во неделата соопшти дека извршниот директор Сатја Надела разговарал со Трамп и дека е „подготвен да ги продолжи разговорите со цел да ги истражи можностите за купување на бизнисот на„ ТикТок “во САД“.