Адвокатка од Њујорк, која не сакаше да го открие идентитетот, ги тужи актерите Бен Афлек и Мет Дејмон за малтретирање и следење.
Во оваа тужба, жената тврди дека Бен Афлек и Мет Дејмон го користеле нејзиниот идентитет и личните искуства за потребите на нивниот филм, без нејзина дозвола.
Актерското дуо е обвинето дека ѝ го нарушиле домот и хакирале уреди, поради што се плаши дека ќе биде киднапирана и силувана.
Овој случај, во најмала рака, ја разбранува јавноста, но и актерскиот свет. Како што наведе повредената жена во тужбата, до која ексклузивно дојде Дејли Меил, неколку филмови, како на пр.„Maid in Manhattan“ и „Gone girl“, содржат елементи преземени од нејзиниот приватен живот.
Во тужбата, поднесена во Врховниот суд на Њујорк, се именувани и Кејси Афлек, Џенифер Лопез, Кевин Смит, Рајан Сикрест и Харви Вајнстин како соучесници во наводниот плагијат и лични приказни без барање.
Во 2001 година, наводната жртва стана дел од веб-страницата основана од Мет Дејмон и Бен Афлек, наречена „Project Greenlight“.
Оваа страница е создадена за писателите да можат да се соберат и да разговараат за нивните идеи.
Како што тврди оштетената, идеите што таа ги презентирала тогаш биле искористени без нејзино одобрение.