Познатиот моден дизајнер Валентино Гаравани почина на 94-годишна возраст.
Модниот свет е во голема тага. Денеска, 19 јануари, од Италија пристигнува тажна вест – почина култниот дизајнер Валентино Гаравани. Веста за смртта на еден од највлијателните дизајнери на високата мода во втората половина на 20-тиот и почетокот на 21-виот век брзо одекна низ модната индустрија. Гаравани, основачот на модната куќа „Валентино“, со децении беше автор на препознатлив естетски потпис кој симболизираше елеганција, луксуз и безвременски стил.
Роден во Италија, Валентино ја започна својата кариера откако студираше во Франција, каде што ги стекна темелите на високата мода. На почетокот на шеесеттите години, отвори свое модно ателје и набрзо стекна меѓународен углед. Неговите колекции ги носеа бројни филмски ѕвезди, членови на кралски семејства и политички елити, поради што брендот „Валентино“ стана синоним за престиж на глобалниот пазар.
Легендарниот Валентино е познат, особено, по употребата на интензивна црвена боја, позната како „црвената на Валентино“, која стана заштитен знак на неговата естетика.
Во текот на неговата долга и завидна кариера, тој освои бројни награди и признанија за неговиот придонес во модата и дизајнот, а неговата работа остави длабок белег врз развојот на модерната модна индустрија.
Гаравани се повлече од активната дизајнерска работа во 2000-тите, но сепак остана симбол на брендот и влијателна личност во светот на луксузот. Модната куќа „Валентино“ продолжи да работи под ново креативно водство, задржувајќи ги препознатливите елементи поставени од основачот.
Детали за причината за смртта и можните комеморативни настани сè уште не се објавени.
За потсетување, Гаравани го напуштил семејниот дом на 17-годишна возраст за да студира модна илустрација на Институтот Санта Марија во Милано, каде што студирал и француски јазик. Набрзо се преселил во Париз, каде што се запишал во École des Beaux-Arts и почнал да студира мода. Иако конкуренцијата била исклучително силна, Валентино го пронашол патот до врвот. Се пријавил на престижниот натпревар „Вулмарк“ и ја освоил првата награда, која подоцна ја освоија Ив Сен Лоран, Карл Лагерфелд и, неодамна, Сол Неш. Во 1950 година, тој станал едно од најистакнатите млади имиња во модната индустрија и му била понудена работа од францускиот кутуриер Жан Десе. Со него ги научил техниките на изработка на вечерни фустани и рачно плисирање, а во тоа време скицирал колекција венчаници наречена „Фустани од соништата“, која никогаш не ја реализирал, сè до 1991 година. Потоа, по повод 30-годишнината од модната куќа „Валентино“, неговиот тим изработил фустани од оваа колекција како изненадување и ги прикажал како дел од изложбата.