Повеќе од 300 ресторани од познатиот ланец „Pizza Hut“ ќе бидат трајно затворени по банкротот на една од најголемите франшизи на овој бренд.
Компанијата NPC International, која е во постапка на стечај, во понеделникот постигна договор со сопствениците на „Pizza Hut“, компанијата „Yum“, за затворање на четвртина од своите ресторани и продажба на останатите, објави Си-Ен-Ен.
Деловниот неуспех на NPC International се припишува на воведувањето вонредни мерки заради коронавирусот и долговите од скоро милијарда долари.
Од „Pizza Hut“ соопштија дека работата на споменатите 300 локации функционирала многу лошо во споредба со другите локации на овој добро познат бренд за брза храна, и дека компанијата ќе им помогне на работниците кои ги загубиле работните места да преминат во другите ресторани на „Pizza Hut“.
Компанијата NPC International има вкупно 1.227 локации каде што работат ресторани на „Pizza Hut“, што е приближно 18 проценти од вкупно 6.700 „Pizza Hut“ во САД.