Европската комисија (ЕК) треба да одреди краен рок за забрана на бензински и дизел автомобили на ниво на ЕУ за да го усогласи транспортниот сектор со поставените климатски цели, објавија во средата девет земји-членки.
Предводени од Данска и Холандија, земјите напишаа писмо во кое ја повикуваат ЕК да спроведе поамбициозни политики на ЕУ во транспортот, кој е одговорен за една четвртина од стакленичките гасови.
Тоа мора да вклучи постепено укинување на нови бензински и дизел возила за да се постигнат нула емисии на стакленички гасови, се наведува во извештајот на Ројтерс.
„Треба да ја забрзаме зелената транзиција на патниот транспорт, додека пратениците испраќаат јасни сигнали до производителите на автомобили и потрошувачите ширум ЕУ“, рече данскиот министер задолжен за клима, Дан Јоргенсен.
Писмото го потпишаа и Австрија, Белгија, Грција, Ирска, Литванија, Луксембург и Малта.
ЕК во јуни ќе претстави построги стандарди за емисија на јаглерод диоксид за нови автомобили во пакет мерки насочени кон постигнување на целта за намалување на стакленичките гасови за најмалку 55 проценти до 2030 година, во споредба со нивото од 1990 година. Климатската неутралност треба да се постигне до 2050 година.
Девет членки сметаат дека сегашните стандарди имаат потреба од „значително зајакнување“ и дека ЕУ треба да ја подобри својата инфраструктура за полнење на батерии и други горива што не испуштаат стакленички гасови.
Законите на ЕУ треба да се изменат за да им се овозможи на членовите да работат на национално ниво за да ги напуштат бензинските и дизел возила.
Дел од производителот на автомобили веќе ги претстави плановите за целосно префрлување на електрични возила. Шведски „Волво“ минатиот месец објави дека тоа ќе го постигне до 2030 година, а „Форд“ дека сите автомобили продадени во Европа до таа година ќе бидат електрични.
Британската влада планира да забрани продажба на нови автомобили кои работат на бензин во 2030 година.
Минатата година во ЕУ се продадени скоро милион електрични возила, или 10 проценти од вкупната продажба.