Сите сакаме слатки, но не сме свесни дека шеќерот е големиот непријател на нашето здравје. Откако ќе го исфрлиме од исхраната, се случуваат значителни промени.
Природните шеќери кои се наоѓаат во овошјето, млекото и други намирници не се лоши, тие се добри за вашето здравје и можете да ги консумирате во поголеми количини преку гореспоменатите намирници. Сепак, индустриски преработените и рафинираните шеќери се голема опасност.
Ако ги отстраните од исхраната, можете драстично да го подобрите вашето здравје, а лесно можете да ги замените со природни замени за шеќер како мед, стевиа или јаворов сируп.
Се разбира, полесно е да се каже отколку да се направи. Сепак, важно е да се донесе одлука, а со укинувањето на шеќерот ќе спречите најголем дел од штетата што ја предизвикува, додека долгорочните ефекти можат да бидат импресивни. Доколку одлучите да го прифатите предизвикот и да се откажете од шеќерот, ќе ви се случат многу позитивни промени.
Што се случува по првата недела?
Откако ќе престанете да консумирате шеќер само една недела, една од две работи ќе му се случи на вашето тело.
Ако во вашиот претходен животен стил доминираа преработена храна, газирани сокови и шеќери, веројатно се уште сте во фаза на детоксикација.
На крајот на краиштата, шеќерот е зависност и не можеме да се ослободиме од повеќето зависности освен ако прво не почувствуваме одредени симптоми и не поминеме низ криза. Во првата недела, а ако сте јаделе многу шеќер, тогаш малку подолго, може да почувствувате желба за шеќер, анксиозност, па дури и депресија во посериозни случаи.
Овие ефекти обично се намалуваат по првата недела, но во зависност од нивото на зависност од шеќер, може да потрае дополнителна недела или две.
Ако вашиот внес на шеќер е поумерен и сте се префрлиле на диета богата со протеини, влакна и здрави масти, треба да почнете да се чувствувате прилично добро по само седум дена. Ќе бидете помалку троми, количината на енергија во текот на денот ќе биде постабилна, а вашето расположение ќе се подобри.
Што по еден месец, а што по една година?
По еден месец без шеќер, вашата желба за десерти ќе исчезне, а наместо тоа ќе ви се засили желбата за протеини и зеленчук.
Ако поминете цела година без преработени шеќери, вашето здравје ќе се подобри. Вашето тело ќе се прилагоди да функционира на основните хранливи материи, а најверојатно ќе изгубите и килограми.
Ве молиме имајте предвид дека како дел од таков начин на живот, од време на време можете да се почестите со нешто слатко. Целта е најчесто да се храните здраво, но ако го внесете повремениот „сладок исклучок“ во вашата исхрана, тоа не треба да ви пречи.
Ако одлучите да го прифатите предизвикот и да го исфрлите шеќерот, ова се позитивните промени што ќе ви се случат како резултат на тоа.
1. Ќе ви се стабилизира телесната тежина
Зависноста од шеќер е вистинска. Колку повеќе го консумирате, толку повеќе го сакате, особено ако јадете многу преработени шеќери, кои ги има во масната и брзата храна и оброците богати со јаглени хидрати. Ако го „симнете“ шеќерот, вашето тело ќе ви се заблагодари бидејќи нема да мора да се бори со несаканите дополнителни калории. На почетокот ќе почувствувате голема желба за слатки, но кога телото ќе ви се исчисти од вештачки шеќери, ќе престанете да чувствувате постојано глад, ќе изгубите килограми и ќе ви се стабилизира тежината.
2. Ќе имате повеќе енергија
Кога сме уморни, често консумираме храна или енергетски пијалоци кои содржат големи количини шеќер бидејќи сакаме нешто брзо да не „крене“. Иронично е што ние всушност го лишуваме телото од потребната доза на енергија. Имено, целиот шеќер што го консумираме ја блокира способноста на нашето тело да ја одржува енергијата на максимално ниво. Затоа, кога сте уморни, не посегнувајте по чоколади или пијалоци со многу кофеин и шеќер. На овој начин ќе ги избегнете големите подеми и падови на шеќерот во крвта, кои всушност прават да се чувствувате уморни.
3. Кожата ќе ви биде поздрава и поубава
Не е тајна дека шеќерот ги влошува акните и мозолчињата, а често и ги предизвикува. Ако не можете да се ослободите од нив со сесрдна помош на козметичарите и кремите, размислете да го исфрлите шеќерот од вашата исхрана бидејќи можно е проблемот со акните да ви доаѓа од внатре. Многу луѓе кои го направиле ова потврдуваат дека нивната кожа брзо станала почиста, поубава и поздрава.
4. Вашето варење ќе стане редовно
Нашиот дигестивен систем сака храна со многу влакна и минимум тешка храна, вклучително и шеќер. Дури и драстичното намалување на консумацијата на шеќер ќе направи голема разлика во вашиот дигестивен систем. Стомакот и цревата полесно ќе сварат се што ќе јадете и почесто ќе имате столица, а болниот запек ќе стане само спомен.
5. Ќе престанете да копнеете за шеќер
Верувале или не, можете да се ослободите од желбата за слатки, а отфрлањето на шеќер ќе ви помогне во тоа. По некое време, вашите омилени чоколади може да станат премногу слатки за вас, а најмногу ќе уживате во вкусот на овошјето и природните шеќери кои се наоѓаат во нив. Кога после месец-два ќе пробате залак од омилената торта, ќе се изненадите колку е всушност блага.