Премиерот Зоран Заев, министерот за земјоделство, шумарство и водостопанство Трајан Димковски, директорот на Платежната агенција Николче Бабовски и претставници од ЕУ денеска во Струга ја отворија фабриката на „Подгорка“ изградена со помош на европски финансиски средства.
Премиерот Заев во обраќањето пред присутните на свеченоста истакна дека овој проект е пример за европеизација на „Подгорка“, дел од европеизацијата на Струга, дел од европеизацијата на Република Северна Македонија. Тој изрази увереност дека брендот на компанијата „Подгорка“„ наскоро ќе биде препознатлив знак за квалитетни преработки од месо, за кои постои голема побарувачка.
-Бинзис идејата и моделот на оваа иницијатива беа високо оценети и како резултат на тоа таа сосема заслужено доби највисока финансиска поддршка од мерката 3 на ИПАРД 2 програмата, односно 2,07 милиони евра. Станува збор за домашна компанија што отвори нови работни места, со нова додадена вредност во нашата економија, рече Заев повикувајќи ги и другите бизнисмени да влегуваат во нови инвестиции, со Владата и институциите како партнери на создавање поволни услови за раст и развој.
Премиерот истакна дека поголемиот дел од производите на „Подгорка“ ќе бидат извозно ориентирани и тоа најмногу во соседна Албанија.
-Големи усилби вложуваме во унапредувањето на регионалната соработка. Создаваме услови за 24-часовно работење на границите, со царински контроли на една точка и меѓусебно признавање на фитосанитарните контроли на производите низ регионот. Се работи на пуштањето на системот „Оне стоп шоп“ на границата на Ќафасан, со што ќе се обезбеди брз транспорт на производите од регионот, за да стигнат на пазарите во оптимално време, за што ќе помогнат и брзите ленти на границите за компаниите, рече Заев.