Пратениците денеска четврти ден ќе се расправа по Дополнетиот предлог за изменување и дополнување на државниот Буџет за 2020 година.
Во досегашната расправа, пратениците од владејачките партии порачаа дека намалувањето на капиталните инвестиции со ребаланост е со единствена цел да се овозможи да се исплатат средства за оние на кои им се најпотребни за да се справат со последиците од коронакризата, а за опозицијата носењето на вториот ребаланс годинава се должи на непрактичното работење на власта.
Со Ребалансот се обезбедуваат средства за реализација на четвртиот пакет антикризни мерки кој содржи сеопфатни мерки за помош на граѓаните, стопанството и економијата. Со него, според предвидувањата, треба да се спасат 83.000 работни места преку исплата на плати за октомври, ноември и декември во износ од 14.500 до 21.776 денари месечено. Покрај тоа, околу 283.000 граѓани треба да добијат платежни картички од по 6.000 денари за зајакнување на куповната моќ и приватната потрошувачка. За компаниите, пак, погодени од кризата, наменети се десетици мерки како грантови, бескаматни кредити, државна и царинска гаранција и даночни олеснувања.
Со ребалансот на буџетот, меѓу другото еден милион евра се предвидени како помош за рестораните кои организираат свадби, но само за регистрираните за таа дејност.
Поединечната сума која ќе ја добие еден објект се движи од 10 до 30 евра, што зависи од остварениот промет во текот на минатата година. Ова е една од мерките од четвртиот антикризен пакет која го чека ребалансот на буџетот за да може да се реализира.
Но, сопствениците на ваквите ресторани велат дека се незадоволни од сумата, иако сметаат дека секоја помош во оваа ситуација е добредојдена. Тие проценуваат дека за да можат да се опорават по шестмесечното неработење, на 150 ресторани им се потребни два ипол пати повеќе пари од предвидените со ребалансот, односно 2,5 милиони евра.
Со ребалансот вкупните приходи во Буџетот се планирани на ниво од 196,3 милијарди денари, вкупните расходи на 252,8 милијарди денари или за 5,5 отсто повеќе во споредба со иницијалниот Буџет за 2020 година, а дефицитот е позициониран на 56,5 милијарди денари, односно 8,5 отсто од БДП. Капиталните расходи се планирани на ниво од 19,1 милијарди денари или за 0,5 милијарди денари пониски во однос на планот за 2020 година.