Русија мора да преземе итни мерки за намалување на употребата на доларот на минимум откако новата американска администрација на Џо Бајден сигнализира дека ќе воведе нови санкции, пренесува Блумберг, повикувајќи се на руски дипломат.
„Ние мора да се спротивставиме на американскиот финансиски и економски систем со цел да се елиминира зависноста од овој извор на постојано непријателство. Треба да ја намалиме улогата на доларот во сите операции“, рече заменик-министерот за надворешни работи Сергеј Рјабков во интервју.
Русија се подготвува за новите санкции на САД како одговор на труењето и последователното затворање на опозицискиот лидер Алексеј Навални. Говорејќи на безбедносната конференција во Минхен минатата недела, Бајден рече дека справувањето со „руската непромисленост и сајбер напади кои влијаат на компјутерските мрежи во САД и низ цела Европа станаа клучни за заштита на нашата колективна безбедност“.
Во последниве години, САД воведоа голем број санкции кон државните банки и корпорации, секторот за нафта и гас, високи функционери и бизнисмени, а најверојатно ќе следат и повеќе ограничувачки мерки, рече Рјабков.
Рускиот претседател Владимир Путин веќе неколку години ја води иницијативата за намалување на изложеноста на активата на САД, за прв пат туркајќи го уделот на златото во резервите на централната банка над уделот на доларот. Сепак, Русија се потпира на американската валута во поголемиот дел од меѓународната трговија, а странските инвеститори имаат скоро една четвртина од нејзиниот државен долг.
Министерството за надворешни работи не е надлежно за економската политика, а Рјабков не прецизираше какви чекори може да се преземат за понатамошно намалување на зависноста на Русија од доларот.
Влошувањето на односите се продлабочи по анексијата на Крим од Украина во 2014 година и наводното мешање во претседателските избори во САД две години подоцна. Администрацијата на Бајден вети дека ќе заземе поостар став кон Русија и размислува за нови санкции за казнување на Москва за големиот кибер напад, кој беше откриен кон крајот на минатата година, и за случајот Навални.
Во меѓувреме, претходно во средата, директорот на Ростех, Сергеј Чемезов објави дека Русија го одложува пуштањето во употреба на својот прв целоруски патнички авион до 2022 година, откако американските санкции го одложија проектот за 18 месеци.
Авионот, познат како МЦ-21, го направи својот прв тест лет во мај 2017 година и требаше да стапи во функција на крајот на 2018 година, но санкциите наложуваа да се одложи. Авионот е опремен со целосно руски мотор PD-14, развиен откако санкциите забранија снабдување со важни делови за проектот во Русија.