Стандард
АНАЛИЗИ

Пеколна сезона: Како се подготвуваат ски-центрите во Европа за претстојната сезона?

Пред една недела, имаше голем оптимизам кај љубителите на зимските спортови дека сезоната на скијање ќе започне пред крајот на годината. Но, тоа брзо испари откако голем број европски лидери повикаа зимските центри да останат затворени, што доведе до несигурност и за луѓето кои работат во туристичката индустрија и за оние кои се прашуваат дали да резервираат зимски одмор.

Сега е помалку веројатно дека скијачката сезона во Европа ќе започне целосно пред 2021 година. Дури и следната година, таа може да претрпи заклучување во последен момент. Еден тур-оператор ја опиша 2020 година како „сезона на пеколот“.

Еве што треба да знаете ако планирате ски патување до една од главните дестинации за зимски спортови на Стариот континент.

Кои места се отворени?

И германската канцеларка Ангела Меркел и италијанскиот премиер Џузепе Конте повикаа сите скијачки центри во Европа да се затворат до јануари за да се ограничи ширењето на коронавирусот. И во телевизиска изјава во вторникот, францускиот претседател Емануел Макрон рече дека се чини „невозможно“ да се размисли за отворање лифтови кон француските скијачки центри за сезоната на празници, иако конечната одлука сè уште не е донесена.

Доколку се воведат овие ограничувања, тие ќе влијаат на многу од првокласните скијачки области и одморалишта на Алпите и во северните Пиринеи.

На другата страна се австриските власти, кои инсистираат на тоа дека ски сезоната може да започне во декември, по крајот на втората национална блокада во земјата. Огромниот австриски регион Арлберг, каде се наоѓаат одморалиштата Св. Антон, Лех и Зурс, како и другите одморалишта во близина, како што е Ишгел, каде што беше избувнувањето на вирусот минатата зима, сега треба да бидат отворени на 17 декември – три недели подоцна од вообичаеното.

Швајцарија која не е членка на ЕУ е исто така отворена за голем број одморалишта, вклучувајќи ги Зермат, Саас-Фи, Вербиер, Енгелберг и Андермат. Во моментов таму работат ограничен број лифтови, кои по 5 декември ќе работат со полн капацитет.

Одморалиштата во Шведска, која ги заостри ограничувањата во последните денови, но никогаш не воведе национална блокада, се исто така отворени за скијање.

Бугарија исто го одби повикот на Германија за затворање на ски-центрите.

Сè уште не е јасно како другите дестинации, вклучително и одморалиштата во Словенија и Шпанија, имаат намера да работат во наредните месеци.

Како ова ќе влијае на зимските одморалишта?

Секое затворање би бил огромен удар за скијачката индустрија, која се надеваше на релативно жива сезона по воведувањето заштитни мерки против КОВИД-19.

„Разочарани сме“, изјави за Си-ен-ен Оливие Десолти, директор на огромниот француски регион Les 3 Vallees. Тоа е најголемата ски област во светот со 600 км одржани писти.

„Ние ќе ја почитуваме одлуката, но тешко е да ја разбереме, бидејќи подготвивме сè. Од 15 декември, Французите ќе можат да ја обиколат Франција и доколку дојдат во нашите одморалишта ќе можат да шетаат по планините или да ги истражуваат езерата, продавниците исто ќе бидат отворени, но чудно е што скијачките патеки нема да можат да се отворат“, објаснува тој.

„Економски е многу тешко. Во Les 3 Vallees, нашата економија зависи 90% од зимската сезона. Божиќните празници носат околу 25% од тие приходи, па затоа е многу важно за нас сега да ја започнеме сезоната“, додаде Десолти.

Популарното одморалиште Вал д’Изер е исто така подготвено за отворање, според Сесил Ферандо, кој со нетрпение очекува конечна одлука. „Вал д’Изер е подготвен да ги пречека своите клиенти од 28 ноември и ќе биде повторно подготвен кога здравствената состојба и владата ќе дозволат”, рече таа. „Доколку скијачката област остане затворена, селото Вал Д’Изер е отворено цела година и останува достапно за оние кои сакаат да дојдат и да се освежат со планински воздух. Продавниците ќе се отворат повторно од овој викенд“.

Строги безбедносни протоколи

Одморалиштата ширум Европа воспоставија строги мерки за да обезбедат безбедна средина кога конечно ќе им биде дозволено да се отворат.

Маските за лице во лифтовите се задолжителни, редиците ќе се регулираат, ќе има ограничувања за продадени билети, правила за социјално дистанцирање и носење маски во продавници и ресторани.

Но, освен вообичаените мерки против коронавирусот што беа воведени за заштита на скијачите, кои други промени можат да ги очекуваат гостите откако повторно ќе се отворат одморалиштата?

„Мислам дека услугата ќе биде поограничена за да се минимизира контактот со вработените и, се разбира, некои места ќе изберат да се затворат во текот на зимата, па можеби ќе има и малку помалку достапни ресторани, а услугата во нив ќе биде малку поинаква“, вели Оливер Коркхил, извршен директор на луксузниот ски оператор „Лео Трипи“. „Но, најголемата промена ќе биде фактот дека тешко дека ќе има толпи луѓе што танцуваат околу трпезата оваа сезона. Пијалоците ќе се сервираат на помалите маси од страна на вработените“.

Еден од аргументите во корист на затворање на одморалиштата е дека локалните болници, кои се веќе преполни со пациенти со КОВИД-19, нема да можат да се справат со дополнителниот товар на повредите поврзани со ски несреќи.

„Ние ги почитуваме болниците и она што тие го велат, но бидејќи веќе има многу голем пад на бројот на лица кои се лекуваат во болници, сметаме дека би било посоодветно да се донесе одлука за 10 или 15 дена“, рече Десолти.

„Сметаме дека одлуката за затворање беше донесена прерано. Тоа е она што не разочара“, додаде Коркхил. „Ако Германија и Франција извршат притисок, ќе биде тешко за другите земји да не се согласат. Австрија ќе се покорува и ќе биде принудена да нè затвори. Верувам дека Швајцарија ќе остане отворена, но тешко е да се знае како да се реагира“, додаде тој.

Игра на трпеливост

Недостатокот на туристи за Божиќ и Нова Година е „болен удар врз индустријата што веќе е тешко погодена“, рече Ричард Ламб, ко-основач и директор на „Калума ски“, луксузен тур-оператор со луксузни имоти во Куршевел, Франција и Сент Антон, Австрија.

Најновите изјави се удар и за скијачите во Велика Британија, кои накратко беа охрабрени од најновите вести дека карантинот за пристигнување во Англија ќе се намали од 14 дена на 5 дена со негативен тест КОВИД-19.

„Побарувачката е дефинитивно таму, недвосмислена е. Луѓето копнеат да излезат, но сè додека имаме тестови на аеродром и намален карантин, сите само седат и чекаат. Сите одлуки ќе бидат донесени во последен момент“, рече Ламб.

Коркхил се согласува: „Ако сте личност со повеќе финансиски средства и можете да патувате, ќе го направите тоа, но обичните луѓе веројатно само ќе си речат:„ Не можам да се справам со стресот, јас само ќе го поминам Божиќ дома и ќе скијам во март или април “.

Бидејќи пандемијата ја прекина последната зимска сезона на Алпите, туристичките компании се обидоа да го преструктуираат својот бизнис поради постојано променливите услови околу КОВИД-19. Преговарање за договори за изнајмување со сопственици на куќи, така што тие едноставно плаќаат за неделите што ги користат, плус пофлексибилни политики за откажување се само некои од тактиките.

Лавина од промени

Некои компании, како „ВИП Ски“, кои управуваа со повеќе од 65 луксузни бунгалови во 10 одморалишта во Франција и Австрија, беа принудени да затворат.

„Се бориме против совршената бура, сезоната ќе биде пекол“, рече Ламб. „Toа ќе биде како возење со хорор воз во забавен парк“. Тој очекува само половина од минатогодишната пополнетос, но дури и таа претпоставка е „гатање на кристална топка“.

Поврзани вести

Бајден се подготвува за нов стимул на економијата откако Демократите го освоија Сенатот

Влатко Зорба

Блокадите поради короната ја враќаат заканата од рецесија во Европа

msp-admin

Трговците во Европа се борат да ги преживеат блокадите

msp-admin
error: Превземањето на содржина без дозвола од авторот е дело казниво со закон!!!