Светот се збогуваше со кошаркарската икона Коби Брајант пред една година, на 26 јануари 2020 година, кога во хеликоптерска несреќа во Калабасас, тој почина заедно со неговата 13-годишна ќерка Џана, двајца нејзини соиграчи и уште четворица возрасни.
Но, освен кошаркар, Коби ќе остане запаметен и како бизнисмен, пишува Market Watch.
Приходот на Брајант од неговата спортска кариера во Лос Анџелес Лејкерс изнесува 323.312.307 долари, што го става на третото место во историјата на НБА-лигата по Леброн Џејмс и Кевин Гарнет. Заработува и десетици милиони долари од партнерства со познати брендови како Nike, McDonald’s, Mercedes-Benz и Hublot.
Една од неговите најпрофитабилни инвестиции беше кога сè уште играше во НБА. Брајант тогаш вложи 6 милиони долари во компанијата за спортски пијалоци Body Armour во замена за 10% удел во компанијата, според ESPN. Тој исто така стана портпарол на брендот.
Body Armour се продава како поздрава алтернатива на Gatorade и со текот на годините соработуваше со многу познати спортисти, вклучувајќи ги Џејмс Харден, Мајк Траут и Наоми Осака. Во 2018 година, околу четири години по првичната инвестиција на Коби, Coca-Cola се здоби со малцински удел во Body Armour, проценувајќи ги акциите на кошаркарот на околу 200 милиони долари. Потегот на Coca-Cola и даде можност на компанијата да се натпреварува со Gatorade, чиј сопственик е Pepsi.
Друга успешна инвестиција за Брајант беше лансирање на фирма со ризичен капитал вреден 100 милиони долари, чик ко-основач е Џеф Стибел во 2013 година.
Стибел беше извршен директор на LegalZoom, Web.com и Dun & Bradstreet пред тој и Брајант да вложат свои пари во фондот Bryant Stibel.
Според неговата веб-страница, фондот инвестира првенствено во „деловни активности со фокус на податоци за технологија, медиуми и информации“. Фондот ги диверзифицираше своите инвестиции за да ги вклучи и компаниите во раните фази на раст и поголемите и етаблирани компании.
Според Си-Ен-Ен, фондот сега има средства од над две милијарди долари. Тој е исто така ран инвеститор во The Players ’Tribune, медиумска компанија создадена од спортисти, како и во компанијата за нега на тело Art of Sport.
Инвестираше и во поголеми компании како што се Dell, Alibaba и Epic Games.