СТАНДАРД life
БИЗЛАЈФ

СЗО: Google и Apple не се вклучени во процесот на создавање дигитални пасоши за вакцинација

Европската комисија ги повлече своите зборови дека Apple разговарал со Светската здравствена организација за развој на пасоши за вакцинација, пишува „Блумберг“.

Обвинувањата против технолошкиот гигант дојдоа од претседателката на ЕК, Урсула фон дер Лејен, кој ја искористи изјавата како аргумент пред владите на блокот дека прашањето за дигитални сертификати треба да се реши од ЕУ што е можно побрзо.

По петчасовното видео интервју со 27-те лидери на Европската унија во четвртокот, Фон дер Лејен им изјави на новинарите дека е „важно да се има европско решение“ за создавање на сертификати што ќе им овозможат на земјите да ги отворат своите граници за слободно патување затоа што „Google и Apple веќе ги нудат своите решенија за сертифицирање на вакцините на Светската здравствена организација “.

„Ние сакаме решение на ЕУ“, рече таа.

Само неколку часа подоцна, портпарол на СЗО изјави дека „ниту Google, ниту Apple“ не се пријавиле да учествуваат во процесот.

Дебатата на видео состанокот се фокусираше на тоа како земјите од ЕУ можат да се вратат на животот пред пандемијата, која однесе повеќе од 500.000 животи и имаше големо влијание врз нивните економии.

Иако првично постоеше широко распространета поддршка за пасошите за вакцинација, лидерите не беа во можност да се договорат за придобивките што ќе им ги дадат на луѓето, покренувајќи го прашањето за претстојната летна туристичка сезона во некои од најпогодените земји на блокот.

„Сите се согласивме дека ни треба пасош за вакцинација“, изјави германската канцеларка Ангела Меркел пред новинарите по разговорите во четвртокот.

„Во иднина, сигурно ќе биде добро да имате ваков пасош, но тоа не значи дека само оние што го имаат ќе можат да патуваат. Засега не се донесени никакви политички одлуки“, додаде таа.

Европските лидери се желни да најдат решение откако ја критикуваа програмата за вакцинација, што заостанува зад оние во САД и Велика Британија. Исто така, постои можност за трет бран на Ковид, што повторно ќе доведе до посилни блокади.

На растечката поддршка во ЕУ за дигитален извештај со заеднички критериуми како што се вакцина, негативен тест или изграден имунитет и помогна Меркел, која се чини дека го омекнува својот став кон ова прашање, поддржувајќи го развојот на таков документ.

Грчката влада, една од најупорните за повторно започнување на патувањата, изрази загриженост дека технолошките компании би можеле да ја искористат можноста да ги претекнат владите на ЕУ кои сè уште немаат решение за дигитални пасоши.

„Ако ние, како Европска унија, не дадеме решение, ќе даде некој друг, без разлика дали се тоа големите технолошки компании во САД или некој друг – на крајот решението ќе биде обезбедено“, рече главниот економски советник на грчкиот премиер.

Економиите зависни од туризам, кои претрпеа најголеми загуби минатата година, се решени да ги отворат вратите за оние кои се вакцинирани. Но, други се спротивставуваат на ваквите потези, повикувајќи се на недостиг на убедливи докази дека вакцинацијата го запира пренесувањето на вирусот, како и загриженоста за доделување посебни привилегии на одредени граѓани од правни причини.

ЕУ има за цел да вакцинира 70% од населението до летото, но недостигот на снабдување ја отежнува програмата.

Поврзани вести

Сите лоши шефови имаат барем една од овие 10 особини

Влатко Зорба

Поранешен вработен на Мерцедес со БАГЕР направил штета на компанијата за 2 МИЛИОНИ ЕВРА

Влатко Зорба

На големите патнички бродови им е забрането да се приближуваат до центарот на Венеција

Влатко Зорба