Фитнес-тренерите Натали Ева Мари и Џонатан Којл, ја испробаа секоја популарна диета и секој тренинг. Додека го пробиваа својот пат низ светот на фитнесот, научија многу лекции на потешкиот начин.
Со разоткривање на некои од најчестите митови, тие сакаат да им помогнат на другите да ги избегнат истите грешки.
За „Live Strong“, тие наведоа три од најчестите митови за исхраната и вежбањето.
„Вежбањето е поважно од диетата“
Исхраната е исто толку важна како и вежбањето за целокупното здравје.
„Вашата исхрана мора внимателно да се планира и да го надополнува она што го правите во теретана, инаку едноставно не функционира. Нема да видите резултати“, вели Мари.
На пример, ако нашата цел е да изградиме мускули, треба да се фокусираме на добивање доволно протеини секој ден.
„Ако вежбата им помогнала, ќе ми помогне и мене“
Многумина од нас пробале програма за вежбање откако слушнале за неверојатните резултати на другите луѓе. Којл ја нагласува важноста да се најде она што најдобро ни одговара кога станува збор за исхраната, како и за вежбањето.
„Секој од нас е уникатен и она што функционира за една личност нема нужно да функционира за друга“, објасни тој.
„Прескокнувањето на одморите не е толку лошо“
Да му се даде време на вашето тело да се опорави по вежбањето е клучно за спречување на повреди и дозволување на вашите мускули да се обноват.
„Се каам што не го сфатив сериозно закрепнувањето со вежбање кога бев помлад. Секогаш се прашував себеси: „Зошто? Досадно е и нема да ми помогне“. Но, сега е докажано дека закрепнувањето е клучно за долгорочните резултати“, посочува Мари.