Епл ги повика вработените во своето седиште во Силиконската долина да работат од дома поради „претпазливост“, за да се избегни ширење на коронавирусот.
Официјални претставници на округот Санта Клара, каде се наоѓа кампусот „Епл Парк“ со 12.000 вработени, претходно ги повикаа големите компании да размислат за да им дозволат на вработените да работат од дома или на други начини да го ограничат блискиот контакт.
Во оваа област до вчера беа потврдени 20 случаи на заразени со коронавирус, соопштија официјалните лица.
Епл, исто така, побара од вработените во канцеларијата во Сиетл да работат од дома. Но продавниците во Санта Клара остануваат отворени, пренесе „Ројтерс“.
Компанијата соопшти во февруари дека ширењето на вирусот во Кина нема да донесе предвиден профит за првиот квартал и дека производството на ајфони ќе се намали.