Извор во „Фајненшл тајмс“ тврди дека „Мајкрософт“ планира да го откупи целиот бизнис на „ТикТок“ ширум светот, и дека аквизицијата нема да биде ограничена само на САД и неколку други земји. „БајтДенс“, во овој случај, сè уште ќе биде сопственик на еквивалентната апликација на „ТикТок“ за Кина.
Глобалниот договор ќе ги елиминира проблемите со одвојувањето на функциите и ќе им овозможи на корисниците на „ТикТок“ од една земја сè уште да можат да ја користат апликацијата при посета на друга земја.
Покрај горенаведеното, „Мајкрософт“, наводно, преговарал за додавање на договор што ќе и даде на компанијата една година да го оддели „ТикТок“ од „БајтДенс“ и да се решат безбедносните проблеми. „БајтДенс“ и „Мајкрософт“ досега не коментираа за ова прашање.
Не е изненадување што „Мајкрософт“ барем се обидува да склучи ваков договор. Претседателот на САД, Доналд Трамп смета дека „ТикТок“ е закана сè додека е во сопственост на Кина, и тој посочи дека полесно ќе се купи целосна компанија отколку само дел од неа. Ова дополнително би ги задоволило барањата на Трамп и би ги намалило шансите услугата да биде забранета во САД, со што би изгубиле над 100 милиони корисници.
Засега нема гаранции дека ќе се спроведе набавка од овој обем, и доколку се случи тоа, уште поголем предизвик ќе биде целосното одвојување на услугата од сопственоста на „БајтДенс“ во одреден временски период.