Србија планира да го забрани извозот на литиум од наоѓалиштето „Јадар“, а целта на Белград е да ја направи земјата европски центар за производство на литиум-јонски батерии, електрични возила и други производи што го содржат овој елемент. Ова во понеделникот го најави премиерот на нашиот северен сосед, Ана Брнабиќ.
Според плановите на владата, Србија може да привлече 1,5 милијарди евра или 1,8 милијарди долари во приватни инвестиции за развој на „Јадар“, каде што, според пресметките на рударскиот гигант „Рио Тинто“, се наоѓаат околу 10% од светските наоѓалишта на литиум.
„Извозот на металот ќе биде невозможен како суровина, ние мора да произведуваме готови производи што содржат литиум за да обезбедиме економски раст“, рече Брнабиќ, цитирана од SeeNews.
Минатата година стана јасно дека британско-австралискиот гигант „Рио Тинто“ ќе инвестира 460 милиони долари во развој и производство во наоѓалиштето „Јадар“. Сместено е во близина на градот Лозница во западниот дел на земјата и е откриено во 2004 година. Според проценките, може да произведе 55 илјади тони литиум годишно. „Јадар“, исто така, има резерви на руда од 16,6 милиони тони во концентрација од 1,18% литиум оксид и 13,4% бор триоксид.
Истражувањето на наоѓалиштето е сè уште во тек, по што експлоатацијата ќе може да започне во рок од 4 години.