Светската трговска организација денес назначи нов генерален директор – д-р Нгози Окоњо-Ивеала од Нигерија, прва жена и Африканка на таа позиција.
Окоњо-Ивеала стана првата жена и првата Африканка на чело на глобалното трговско тело, со кое СТО напиша нова страница во својата историја, која датира од 1995 година, објавена е на веб-страницата на таа светска организација.
Окоњо-Ивеала беше назначена за челната позиција откако последниот преостанат противнички кандидат, јужнокорејскиот министер за трговија Јо Мијунг-хе се повлече од трката.
Окоњо-Ивеала ќе стапи на должност на 1 март, а нејзиниот мандат ќе трае до август 2025 година.
Економистот и поранешен министер за финансии на Нигерија, Окоњо-Ивеала, доби широка поддршка од членките на СТО, вклучително и поддршка од Европската унија, Кина, Јапонија и Австралија.
САД под поранешниот претседател Доналд Трамп, го фаворизираа јужнокорејскиот кандидат и остро ја критикуваа работата на СТО, парализирајќи некои нејзини активности, вклучително и функционирањето на врховното апелационо тело на регулаторот за глобална трговија, кое е одговорно за пресуда за трговски спорови.
СТО, која има 164 земји-членки, остана без лидер откако Бразилецот Роберто Азеведо се повлече од функцијата една година пред истекот на мандатот, и ја напушти функцијата на почетокот на август 2020 година.
Поддржувачите на Окоњо-Ивеала се надеваат дека ќе може да ја оживее оваа институција, која минува низ најголемата криза во својата 26-годишна историја, поради дијаметрално спротивставени позиции меѓу членовите кои не можат да се договорат за трговски договори и реформска програма.
Таа посочи дека е потребна силна Светска трговска организација за да се помогне во борбата против економските влијанија на пандемијата на коронавирус.
„Со нетрпение очекувам да работам со членовите за да ги обликуваме и имплементираме одговорите и акциите што ни се потребни за повторно воспоставување на глобалната економија. Нашата организација се соочува со многу предизвици, но заедно можеме да го направиме СТО посилно, поагилно и прилагодливо на денешните предизвици“, рече таа.