Сите намирници влијаат на нивото на шеќер во крвта, некои повеќе, некои помалку. Доколку имате преддијабетес или дијабетес, важно е да изберете храна која има најмало влијание врз нивото на шеќер во крвта, а кога станува збор за овошјето, тоа се боровинките.
Според нутриционистите, можеме да уживаме во секакво овошје, но боровинките имаат помалку јаглехидрати и природен шеќер од другите, па затоа се подобар избор, пренесува Индекс.
„Можете да јадете повеќе боровинки од друго овошје“, тврди нутриционистката Џоселин Лоран.
Во порција боровинки (која се вклопува во една чаша), свежи или замрзнати, има 22 грама јаглени хидрати и 15 грама шеќер. Покрај тоа, боровинките содржат влакна (4 грама по порција), што значи дека нивниот природен шеќер полека се апсорбира во крвотокот.
Боровинките се богати со полифеноли, група на хранливи материи со антиоксидантни и антиинфламаторни својства кои можат да бидат корисни за здравјето. Студија од 2023 година потврди дека полифенолите можат да помогнат во заштитата од кардиоваскуларни болести и да го подобрат крвниот притисок. Антоцијаните, типот на фитохемикалија што им дава на боровинките сино-виолетова боја, може да се поврзат и со намален ризик од дијабетес тип 2, срцев удар и дебелина, според студијата од 2020 година објавена во списанието Advances in Nutrition.
Боровинките се исто така добар извор на други есенцијални хранливи материи како што е витаминот Ц, кој го подобрува здравјето на кожата и заздравувањето на раните, витамин К, кој игра улога во згрутчувањето на крвта и манган, кој го помага метаболизмот и ги одржува силните коски и имунолошкиот систем.