Трошоците на животот во јануари 2021 година, во однос на претходниот месец, се пониски за 0,2 проценти, а кај цените на мало нема промени.
Во однос на јануари лани трошоците на живот се зголемиле за 1,9 проценти, а цените на мало за 1,6 проценти, објави денеска Државниот зваод за статистика. Намалување на индексите на трошоците на животот во јануари 2021 година, во споредба со претходниот месец, е забележано кај свежиот и разладениот зеленчук, освен компири и други коренести плодови за 6.5 проценти, свежото и разладеното овошје за 1,6 проценти, виното за 0,5 проценти, месото за 0,4 проценти, рибата и морските плодови, сирењето и урдата за 0.3 проценти, минералната вода, газираните пијалаци, соковите од овошје и зеленчук за 0.2 проценти.
Исто така, намалување на индексите на трошоците на животот е забележано и кај домашните миленици и сродните производи за 2,7 проценти, течните горива за домаќинствата за 1.9 проценти, опремата за спорт, кампирање и рекреација на отворено за 1,3 проценти, информатичката опрема за обработка на податоци за 1,1 процент, обувките за 1 проценти, цврстите горива за домаќинствата за 0.9 проценти, малите електрични апарати за домаќинствата за 0.6 %, опремата за прием, снимање и репродукција на звук и слики за 0.5 проценту, другата облека и додатоците за облека за 0.4 проценти, облеката, стаклените садови, кујнскиот прибор и другата опрема за 0.2 проценти.
Пораст на трошоците на животот во јануари 2021 година, во споредба со претходниот месец, е забележан кај шеќерот, џемот, медот, чоколадата и кондиторските производи за 0.6 проценти, прехранбените производи неспоменати на друго место за 0.5 проценти, маслото и маснотиите за 0.4 проценти, жестоките пијалаци за 0.3 проценти.
Во јануари, исто така, пораст на трошоците на животот е забележан и кај електричните апарати за лична хигиена за 4 проценти, гасот за домаќинствата за 3.6 проценти, горивата и мазивата за сопствените превозни средства за 2.0 проценти, мебелот и покуќнината за 1.6 проценти, велосипедите за 1.4 проценти, големите електрични апарати за домаќинствата за 1.0 процент, патниот патнички транспорт за 0.8 проценти, градините, растенијата и цвеќињата, книгите за 0.6 проценти, другите апарати и производи за лична хигиена за 0.4 проценти, моторните возила, одржувањето и поправката на сопствените превозни средства за 0.3 проценти, фармацевтските производи, другото образование, угостителските услуги за 0.2 проценти.