Земјите од Евроазиската економска унија започнаа да формираат заеднички пазар за гас, нафта и нафтени деривати, изјави рускиот претседател Владимир Путин.
„Земјите-членки го одобрија концептот за формирање заеднички финансиски пазар на Евроазиската економска унија, а во тек се подготовки за создавање на заеднички пазар на електрична енергија. Почнавме програма за формирање на заеднички пазари за гас, нафта и нафтени деривати“, рече Путин на состанокот за интегративните процеси во ЕАЕУ.
Во декември, лидерите одобрија план за акција за усогласување на законите на земјите од Унијата во нафтениот сектор, а исто така одлучија да преминат во втората фаза на формирање на заеднички пазар на гас – создавање на инфраструктура, технолошка и правна рамка на пазарот.
Претседателот додаде дека во повеќето економски сектори, заедничките пазари се веќе формирани и успешно работат, додека во други области, практичните прашања се решаваат и се бараат оптимални модели.
Тој го наведе создавањето единствен пазар за производство и трговија со лекови и медицински помагала како пример за успешно наоѓање компромис меѓу земјите-членки на ЕАЕУ.
„Од 1 јануари годинава, регистрацијата на сите лекови во земјите на ЕАЕУ се врши во согласност со униформни правила и процедури. Ова е исклучително важно сега … кога нашите земји се соочуваат со заеднички предизвик – епидемијата на коронавирусот. И ние мора ефикасно да ги координираме напорите за заштита на животот и здравјето на нашите граѓани“, заклучи Путин.