Истражувачи од „Касперски“ испитале 15 различни пазари на „Даркнет“ и откриле реклами за три вакцини против коронавирус – „Фајзер / БајоНТек“, „АстраЗенека“ и „Модерна“.
Според изјавата, имало и продавачи кои рекламирале непроверени вакцини.
„Повеќето продавачи се наоѓаат во Франција, Германија, Велика Британија и САД, а цените по доза се движеа од 250 до 1.200 долари, со просечна цена од околу 500 долари. Комуникацијата се прави преку шифрирани апликации за пораки како што се „Викр“ и „Телеграм“, додека барањето за плаќање се прави во форма на криптовалута, пред сè биткоин“, велат од Касперски.
Се додава дека повеќето од овие продавачи од црниот пазар извршиле меѓу 100 и 500 трансакции, што укажува на тоа дека оствариле продажба, но што точно купуваат корисниците на „Даркнет“, останува нејасно.
„Со достапните информации на експертите од „Касперски“, невозможно е да се каже колку дози на вакцини рекламирани преку Интернет се вистински дози (многу медицински институции се најдоа во ситуација да ги користат преостанатите дози) и колку рекламата е всушност измама. Дури и да добиете нешто по пошта, најверојатно она што би го добиле не би била ефективна, валидна доза. Што е уште поважно, добивањето такви дози е незаконско“, се наведува.
Експертот за безбедност Дмитриј Галов вели дека на „Даркнет“ можете да најдете скоро сè, па затоа не е изненадувачки што тамошните продавачи ќе се обидат да ја искористат кампањата за вакцинација.
„Во текот на изминатата година, имаше голем број измами кои ја искористија темата за Ковид-19, и многу од нив беа успешни. Во моментов, не само што луѓето продаваат дози на вакцини, туку тие исто така продаваат евиденција за вакцинација – документи што можат да ви помогнат да патувате слободно. За корисниците е важно да бидат внимателни кога станува збор за какви било „понуди“ поврзани со пандемијата и, се разбира, никогаш не е добра идеја да се купи вакцина од „Даркнет“, вели Галов.