На почетокот на оваа недела, големата вест во светот на криптовалутите беше дека „Тесла“ купи биткоин за 1,5 милијарди долари, што доведе до пораст на неговата цена до нов историски рекорд. Но, компанијата на Елон Маск нема да биде ограничена само на ова. Покрај криптовалутата, тие ќе започнат да купуваат злато и „други средства“ како потенцијална инвестиција, се вели во последниот годишен извештај на компанијата.
„Во јануари 2021 година, ја обновивме нашата политика за инвестиции за да имаме поголема флексибилност за диверзифицирање во иднина и да го максимизираме повратот. Може да инвестираме дел од овие износи во некои алтернативни резервни средства, вклучително и дигитални средства, физичко злато, фондови со злато со кои се тргува и друго“, се вели во извештајот.
Сепак, одлуката на компанијата веројатно нема да доведе до еуфорија што беше забележана кога таа купи биткоин.
„Она што тие не ви го кажуваат е дека тие не веруваат во американскиот долар“, вели извршниот директор на Celsius Network, Алекс Машински за Kitco. „Со набавка на биткоин и употреба на злато како референца, тие навистина не сакаат нивните резерви да бидат во долари, затоа што очекуваме висока инфлација, девалвација и сè друго, но не и позитивни вести за доларот“.
Но, додека перцепцијата на биткоинот покажува дека лидерите во индустријата се веќе многу поповолно настроени кон криптовалутата, претприемачот сигурно се соочува со предизвици при диверзифицирање на портфолиото на компанијата.
„На Маск му е многу полесно да ги купи на свој трошок, но убедувањето на бордот на директори и инвестициската заедница дека ова е позитивен потег е дефинитивно многу повисока граница“, рече Машински.
„Во 2017 година, хероите и амбасадорите на биткоин и етереум беа луѓе кои не беа на врвот на деловниот свет. Денес, некои од најдобрите и најпознатите луѓе во светот стојат зад криптовалутите“, додава тој.