Организацијата за економска соработка и развој (ОЕЦД) ја зголеми прогнозата за глобалниот раст за оваа и следната година, повикувајќи се на подобрени економски перспективи како се забрзуваат вакцинациите против Ковид-19 и новиот огромен пакет за економски стимулации на САД.
Светската економија годинава ќе порасне со стапка од 5,6 проценти и следната година со 4,0 проценти, објави денеска ОЕЦД во привремениот извештај за економските перспективи, пренесе Ројтерс.
Најновите проекции на ОЕЦД значително се зголемија во споредба со декември, кога организацијата со седиште во Париз предвиде глобален раст од 4,2 проценти за оваа година и 3,7 проценти за 2022 година.
Како негативни ризици што можат да влијаат на подобрените глобални изгледи, ОЕЦД ја наведува брзината со која земјите ќе вакцинираат луѓе, колку брзо ќе ги отстранат ограничувањата и дали ќе ги ограничат новите видови на коронавирус.
„Главниот приоритет на политиката е да се осигури дека се користат сите потребни ресурси за производство и целосно спроведување на вакцинацијата што е можно поскоро“, се вели во извештајот на ОЕЦД.
Тој проценува дека глобалниот бруто домашен производ (БДП) треба да се врати на нивото на пред-пандемијата до средината на оваа година, иако со големи варијации по одделни земји.
Покрај вакцинацијата што го активира глобалниот економски раст, ефектите од планираниот стимулативен пакет од 1,9 трилиони американски долари ќе се пренесат на други земји, зголемувајќи го глобалниот раст за повеќе од една процентна точка, се додава во извештајот
Според новите предвидувања на ОЕЦД, економијата на САД годинава ќе порасне за 6,5 проценти, а следната година за 4,0 проценти, што е над декемвриските проекции од 3,2 проценти, односно 3,5 проценти.
ОЕЦД проценува дека пакетот, кој вклучува 400 милијарди долари еднократна помош од 1400 американски долари за многу Американци, ќе го зголеми растот на производството во просек за околу 3-4 проценти од година во година.
Исто така, предвидува дека пакетот мерки на САД може да доведе до создавање до три милиони работни места во САД до крајот на годината, но исто така и зголемување на инфлацијата во просек за 0,75 процентни поени годишно во првите две години.
Во исто време, американскиот пакет ќе биде благодет за главните трговски партнери на САД, каде што растот може да го стимулира растот на Канада и Мексико за 0,5-1,0 проценти, како и растот на еврозоната и Кина за 0,25 -0, 5 процентни поени.