Четиригодишната правна битка меѓу актерот Роберт де Ниро и поранешна негова вработена започна во понеделникот во федералниот суд на Менхетен, со обвинувања за родова дискриминација и несоодветно трошење.
Греам Чејс Робинсон започна да работи за Де Ниро во 2008 година како извршен асистент пред да се искачи на позицијата потпретседател на компанијата. Но, соработката ненадејно заврши во 2019 година кога таа го тужеше Де Ниро и неговата компанија Canal Productions за родова дискриминација. Во нејзината тужба, таа рече дека Де Ниро ја третирал како „канцелариска жена“, терајќи ја да му ги пере чаршафите и да го чеша грбот, и дека и платил помалку од вработен маж, чија работа не бара поголема вештина или одговорност.
Canal Productions потоа ја тужеше Робинсон, обвинувајќи ја дека неправилно префрлила повеќе од 450.000 долари во авионски милји на нејзината лична сметка и потрошила десетици илјади долари пари на компанијата за храна, патувања и други лични услуги.
Судот истовремено ќе одлучува за валидноста на тврдењата на двете страни. Во судските документи, Робинсон негираше дека купила или неправилно ги конвертирала милјите на авиокомпанијата, а Де Ниро ги негираше нејзините наводи за доделување на нејзината „стереотипно женствена“ работа. Робинсон бара отштета од 12 милиони долари за емоционална вознемиреност и оштетување на угледот, поради што таа тврди дека ја оставила без работа и не можела да се опорави од траумата поврзана со работата. Во годината кога ја напуштила работата, нејзината плата била 300.000 долари годишно.
Кога адвокатот на Робинсон го прашал 80-годишниот актер дали и викал кога таа не го разбудила на време за важен состанок, Де Ниро рекол дека ја „искарал“. Понатаму, тој призна дека веројатно ја нарекол „стегната“, „остра“ и „е*ано разгалено детиште“. Сепак, тој негираше дека и викал на Робинсон. „Го кренав гласот“, потврди Де Ниро. „Не викам.Тоа е едно нешто што не го правам“.
Адвокатот на Робинсон исто така тврдеше дека Де Ниро и се јавил двапати за време на погребот на член на семејството. Де Ниро негираше дека знаел дека била на погреб во тоа време.
Во повеќе од пет часа сведочење што кулминираше со меѓусебни обвинувања што во еден момент го поттикнаа Де Ниро да пукне на судењето: „Срам да ти е, Чејс Робинсон!“.
Неговата иритација дополнително ескалирала кога адвокатот го прашал за тврдењата на поранешната асистентка која тврди дека актерот побарал од неа да му го чеша грбот. Де Ниро призна дека тоа можеби се случило еднаш или двапати, но ги отфрли сите сугестии дека има нешто „непристојно“ или „непочитувачко“ во тоа.
Актерот исто така беше долго испрашуван за тврдењата на неговата компанија дека Робинсон ја злоупотребила кредитната картичка на нејзината компанија, вклучително и повеќе од 12.600 долари во ресторанот на Менхетен, Паола, во текот на околу две години и околу 32.000 долари во Uber и такси во текот на истата година. Де Ниро рече дека кога станува збор за обвиненијата, нема пишани правила или политики, но дека и верувал на Робинсон да не ја злоупотребува службената картичка.
„Тоа е здрав разум. Ти верувам и ти дозволувам да процениш што е најдобро“, изјави актерот.