Најопасната година во животот не е ниту во младоста ниту во староста, туку првата година по пензионирањето. Според истражувачот на Сините зони, Ден Битнер, тогаш ризикот од смрт нагло се зголемува, бидејќи многу луѓе ја губат смислата, рутината и чувството на припадност.
– Повеќето луѓе се изненадени од фактот дека најопасната година од животот е токму онаа кога одат во пензија. Тогаш доаѓа до чуден скок на смртноста, веројатно затоа што луѓето го губат својот социјален круг, чувството за цел, а честопати и секојдневните навики што им давале ритам – објаснува Битнер во видеото на својот инстаграм-профил.
– Во Сините зони, луѓето не одат во пензија, туку остануваат ангажирани, им помагаат на другите и живеат со смисла се до длабоката старост – додава тој.
View this post on Instagram
Зошто губењето на рутината е опасно
Психолозите потврдуваат дека ненадејната промена на темпото и губењето на чувството за корисност може да доведат до депресија, намалено движење, полоши навики во исхраната и, индиректно, до влошување на здравјето.
Затоа многумина советуваат да се најде ново значење дури и по напуштањето на работата преку волонтирање, грижа за другите, хоби, патувања или заеднички активности.
Јапонски рецепт за долг живот
Во Јапонија, особено во Окинава, луѓето ретко го користат терминот „пензија“. Наместо тоа, тие го имаат своето икигаи, причината поради која стануваат од кревет секое утро. Тоа чувство на цел, заедно со физичката активност, заедницата и исхраната богата со растителни намирници, стои зад нивната извонредна долговечност.
– Немојте да се повлечете од животот кога ќе се пензионирате од работа. Останете корисни, споделете го вашето знаење, бидете дел од заедницата и ќе се видиме на 100-тата година – порачува Битнер.