Терминот „скршено срце“ не е само фраза, бидејќи крајот на емотивната врска со партнерот, колку и да траеше, може да му наштети на вашето срце.
Се развиваат многу емоции, се чувствувате безволно, немирно, а присутно е и гадење. Тоа е знак дека вашето срце е скршено, а оваа состојба може да влијае на хемијата на вашиот мозок, нивото на хормоните, па дури и на состојбата на вашето срце.
Ова се трите работи кои можат да се случат кога срцето ни е скршено, пишува „The Sun“.
1. Телото поминува низ „повлекување“
Според невронаучникот д-р Луси Браун, постои хемиски коктел одговорен за да се чувствуваме лошо по раскинувањето. Серотонин, окситоцин и допамин се три мозочни хемикалии поврзани со среќата, поврзаноста и системот на наградување на мозокот, по тој редослед.
– Кога ќе изгубиме некого, сме изгубиле многу вреден дел од животот и чувството за себе. Тие обезбедија новина во животот што сега ја нема, па ни требаат некои други награди – вели таа.
2. Болката не е само емоционална
Болката од раскинувањето не е само емоционална, ниту е метафорична. Според истражувањата, телото може физички да боли. Во 2010 година, група истражувачи скенирале мозоци на 15 луѓе со скршено срце и откриле дека нивните емоционални превирања предизвикуваат мозочна активност во истите области каде мозокот ја обработува физичката болка.
Емоционалниот стрес на раскинувањето може да предизвика и симптоми како што се главоболки и гадење.
3. „Скршеното срце“ е ретко, но не и невозможно
Во ретки случаи, емоционалната агонија од кршење на срцето или загуба всушност може да го „скрши“ вашето срце – во она што се нарекува „синдром на скршено срце“ или кардиомиопатија.
Тоа во основа вклучува слабеење на левата комора на срцето и неговата главна комора за пумпање. Според „Харвард Хелт“, ова може да се случи кога некој ќе доживее тешка емоционална вознемиреност како што е загубата на некој близок.
Точната причина зошто тоа се случува не е позната, но експертите веруваат дека порастот на хормоните на стресот во суштина може да го „зашемети“ срцето.