Претседателот на Меѓународниот монетарен фонд (ММФ) Кристалина Георгиева изјави дека е потребно многу внимателно да се повлече политичката поддршка дадена во борбата против пандемијата на коронавирус и дека светот треба да биде подготвен за зголемување на каматните стапки.
Георгиева преку видеоконференција зборуваше за состојбата на глобалната економија на конференцијата организирана од Институтот на Европски универзитет.
Посочувајќи дека глобалната економија започна да се подобрува во април, Георгиева рече дека економиите на Соединетите Американски Држави (САД) и Кина се „два мотори кои работат напорно“.
Додаде дека очекува дека Европската унија (ЕУ) ќе ги стигне овие две економии веќе во летните месеци, благодарение на вакцинацијата, истакнувајќи дека верува дека заздравувањето ќе се забрза.
Потсетувајќи дека глобалната економија се очекува да порасне за 6 проценти оваа година и за 4,4 проценти следната година, Георгиева посочи дека нерамномерното закрепнување меѓу земјите останува сериозен проблем.
Таа исто така истакна дека е неизбежно политичката поддршка дадена во борбата против пандемијата да биде повлечена, додавајќи дека е многу важно тоа да се спроведе многу внимателно.
„Треба да се подготвиме за зголемувањето на каматните стапки. Особено е важно да се следат каматните стапки во САД бидејќи таму има значително движење“, рече Георгиева.
Како што изјави таа, земјите кои сè уште не бележат раст и имаат акумулирано долг, би можеле да се најдат во многу тешка ситуација во потенцијално опкружување на зголемувањето на каматните стапки.
Коментирајќи ги дискусиите за укинување на правата на интелектуална сопственост за вакцините против Ковид-19, Георгиева посочи дека постојат силни економски аргументи за отстранување на пречките за производство и дистрибуција на вакцини, но дека укинувањето на правата на интелектуална сопственост треба да биде придружено со други мерки.