Социјалните мрежи го променија начинот којшто луѓето го водат и приватниот и професионалниот живот. Денес милијарда луѓе ширум светот не може да се сетат каков бил животот без Instagram и не знаат дали може да си го замислат без оваа апликација.
За сè се “виновни“ Кевин Систром и Мајк Кригер, коишто го основаа Instagram на шести октомври 2010-та година. Освен што функционираше како платформа за споделување фотографии, а подоцна и видеа, она по што беше иновативна беа филтрите за светло, контраст и боја. Дури и најобичната фотографија, направена со смартфон, добиваше поинаква димензија кога ќе ѝ беа додадени тие филтри.
Две години по основањето, Instagram му припадна на Facebook по што стана една од најпопуларните платформи којашто се прослави по селфи фотографиите. Денес, оваа платформа им носи милиони долари на многу ѕвезди и инфлунсери кои најверојатно не би биле тоа што се денес да не е Instagram.
Преку оваа социјална мрежа, луѓето ги пренесуваат своите искуства, дневни навики, предизвици и сето она што им се случува, “филтрирајќи“ го и сервирајќи му го на светот на поинаков начин.
Денес, освен што благодарение на Instagram знаеме кој што јадел, каде бил на патување, со кого пиел кафе… на големо се продаваат најразлични производи. Инфлуенсерите ја користат својата база на следбеници и склучуваат договори со маркетинг агенции или брендови за рекламирање, што се покажа како полн погодок.
Како и сè во животот, така и на Instagram има две страни. Покрај социјалната димензија, дружењето, споделувањето, виралноста, маркетингот… експертите предупредуваат дека оваа социјална мрежа на младите луѓе им дава чувство на лажна реалност и им создава притисок за совршенство коешто не можат така чесно дојдат во реалниот свет.
Сето она што му се случи на светот со пандемијата беше почувствувано и на оваа социјална мрежа, па потребно е време за нови навики и функционирање во “дезинфицирани“ услови.