Со месеци, богатите ги напуштаат градовите заради континуираната состојба со коронавирусот. Според новото истражување, цените на првокласните имоти во поголемите градови низ светот паднале, но секако не насекаде.
Вредностите на најскапите 5% од домовите во некои од најпосакуваните градови во светот паднаа во последните 12 месеци, вклучувајќи ги Лондон, Њујорк и Даблин, пишува „Форбс“.
„Процентот на градови кои пријавуваат годишен пад на цените се зголемува, од 23% на крајот на 2019 година на 38% во третиот квартал на 2020 година“, се вели во извештајот на „Knight Frank“, консултантска фирма за недвижнини.
Сингапур забележа најголем пад на цените на луксузните недвижнини, од 6,1% во последните 12 месеци до октомври. Ова, според Леонард Теј, раководител на истражување во „Knight Frank Singapore“, главно се должи на ограничувањата на патувањето, што „малку го намали бројот на странски купувачи во Сингапур“.
Во голем број градови има опаѓање кај странските купувачи бидејќи имигрантите се враќаат дома. Во Дубаи, каде има помалку работни места за мигрантите, дел од законите се олабавени со надеж дека некои ќе останат. Цената на луксузните станови во градот падна за 3,7%. Во Хонг Конг цените паднаа за 5,4%.
Овој пад на цените на урбаните првокласни имоти ја влоши состојбата на нивните сопственици и тоа најмногу се должи на опаѓачката вредност на нивните имоти, каде што е голем дел од нивното богатство.
Сепак, некои градови го следат овој тренд
Зголемувањето на цените на луксузните недвижнини во некои градови ни покажува каде богатите го планираат своето живеење по Ковид-19. Оукланд има најбрз пораст на цените на премиум имотот од кој било град во светот. За 12 месеци до октомври, цените пораснаа за 12% откако Нов Зеланд достигна едно од најниските нивоа на Ковид-19.
Апликациите за престој во Нов Зеланд се зголемија во истиот период. Управниот директор на „Premium Real Estate“ во Оукланд, Џејн Гај, забележа „значителен пораст“ на купувачите кои бараат имот во вредност од над 13 милиони долари.
„Имаме тенденција да гледаме како меѓународните купувачи кои ги привлекува идиличниот начин на живот во Оукланд го ценат тоа во однос на големите меѓународни градови и популарните градови како Сиднеј или Ванкувер“, вели таа.
Манила на Филипините е на второ место во рангирањето на компанијата, што главно се должи на зголемената популарност на одморалиштата во Батангас, провинција јужно од Манила, кои стануваат популарни. Таму цените се зголемија од 20% до 46% во октомври, во споредба со една година порано, според „Leechiu Property Consultants“.
Шенжен во Кина, исто така, забележа значителен пораст на цените во октомври – за 9% на годишно ниво. Следува Торонто, раст од 8,4% на цените на домовите.
Во САД се популарни Лос Анџелес, Сан Франциско и Мајами, додека во Европа, швајцарските градови Цирих и Женева имаат повисоки цени.