„Дали сакате да разговарате со мене во Клабхаус?“, праша извршниот директор на Тесла и Спејс Екс, Елон Маск, во саботата на официјалниот англиски профил на Кремљ на Твитер, наречен „Претседател на Русија“. Милијардерот Маск очигледно сака да разговара со Владимир Путин, дозна заедницата на апликацијата за аудио разговор „Клабхаус“, која во моментов добива популарност.
За што станува збор? И, зошто разговорот треба да се одвива во „Клабхаус“, кога двајцата соговорници можат да користат други канали? Не е јасно.
„Би било голема чест да разговарам со вас“, напиша Маск на руски јазик.
Едно е сигурно: барањето веројатно е прифатено. Портпаролот на Путин, Дмитриј Песков, во понеделникот го нарече предлогот „многу интересен“. Во исто време, тој додаде дека прво мора да стане јасно што точно мислел Маск, бидејќи Владимир Путин обично не користи онлајн апликации, пренесе AФП.
Заборавете на ТикТок: Следната sвезда на социјалните мрежи е Клабхаус
Познатите го сакаат „Клабхаус“
„Клабхаус“ е аудио платформа каде што корисниците можат да посетуваат дигитални простории каде што можат да разговараат за разни теми или само да слушаат дискусија. Пристап до апликацијата имаат само оние кои се регистрираат на листа на чекање или се поканети од постоен член. Така, „Клабхаус“, создаден во 2020 година од страна на „Alpha Exploration & Co“, добива нота на ексклузивност. Засега, апликацијата е достапна само за iOS уреди.
Апликацијата се чини дека им се допаѓа и на познати личности, политичари и технолошки милијардери. Покрај Елон Маск, неодамна во „Клабхаус“ се појави шефот на Фејсбук, Марк Закерберг.
Кание Вест, како и Мик Мил, Џо Бајден и Тори Ланес, веќе се членови на апликацијата иможат да комуницираат поединечно со своите обожаватели.
Неодамна стана јасно дека успехот на платформата веќе го разбуди апетитот кај големите во Силиконската долина, а Твитер и Фејсбук имаат намера да создадат слични услуги.
„Клабхаус“ предизвика реакција и од кинеската влада, која ја блокираше апликацијата на почетокот на минатата недела. Ова стави крај на краткиот прозорец во кој луѓето од континенталниот дел им се придружија на оние од Тајван, Хонг Конг и ујгурската дијаспора да разговараат за теми кои често се цензурираат во Кина без да се користи VPN за да се заобиколи контролата на Интернет. Многу нови кинески корисници на копното разговарале за теми како што се притворање на луѓе во логорите во Ксинџијанг, независноста на Тајван и Законот за национална безбедност на Хонг Конг, кои обично се брзо цензурирани на кинеските социјални медиуми.
Во меѓувреме, „Клабхаус“ соопшти дека ги разгледува своите практики за заштита на податоците откако Интернет-опсерваторијата во Стенфорд ги идентификуваше потенцијалните слабости во својата инфраструктура што може да овозможи надворешен пристап до аудио-податоците на корисниците.
Појавувањето на Елон Маск во „Клабхаус“ предизвика наслови во почетокот на февруари. Маск во апликацијата го интервјуираше Влад Тенев, основачот на платформата за трговија со средства „Робинхуд“. Во тоа време, компанијата на Тенев беше сериозно критикувана по берзанското лудило поврзано со акциите на „Гејмстоп“. Но, тој трпеливо одговараше на сите прашања на Маск.