Магистралниот пат Прилеп-Градско денес беше блокиран 2 часа од страна на тутунарите од Пелагонискиот регион. Тие се отсечни и остануваат на барањата за реален откуп, како и укинувањето на четвртата класа и реална цена за врвните берби.
Исто така тие побараа и официјалниот претставник од Сојузот на земјоделски здруженија да биде со нив и да ги поддржи.
„Целиот проблем ќе биде решен да отстапат откупувачите од четвртата класа и тогаш просекот ќе биде минимум 180-190 денари и реално да се ценат врвните берби. Му се заблагодаруваме на министерот за земјоделство кој брзо оствари средба со нас. Откупувачите го излажаа, прво министерот, а потоа и нас. Бараме и нашиот официјален претставник од Сојузот на земјоделските здруженија Менде Стомнароски да дојде и да биде со нас“, истакна Грујевски, инаку еден од тутунопроизводителите присутни на денешната блокада.
Од Иницијативниот одбор на „Група македонски тутунари“ пак, побараа итно да се дадат гаранции дека сите пунктови и кај сите откупувачи ќе се откупува реално тутунот.
„Под итно да се дадат гаранции, тоа да го направи државата. Секаде, на сите пунктови и кај сите откупувачи во земјава исто да се цени тутунот, реално. И тоа веднаш, зашто ова може да излезе од контрола и да се создадат ковид-кластери. Затоа е важно решение веднаш. Нема да отстапиме и ќе одиме до крај да се реши маката на тутунарите“, посочи Игор Мирчески.
Инаку, по синоќешниот состанок во Прилеп со министерот за земјоделство, тутунарите останаа на ставот да протестираат, а од друга страна, да продолжи откупот на тутунот. Ќе се прави неделен пресек на текот на откупната кампања и на постигнатата просечна цена.