Aмериканските државни облигации опаѓаат, а берзите бележат раст по очекувањата, дека високата потрошувачка и долгови на администрацијата на Демократската партија ќе го зголемат економскиот раст откако ќе добие контрола врз двата дома на Конгресот.
Државните хартии од вредност на САД ја објавија својата најголема продажба во последните неколку месеци откако победите на демократите во двете изборни трки во Џорџија им дадоа контрола на Сенатот и можност да ја спроведат својата програма.
Фјучерсите на S&P 500 пораснаа за 0,6 отсто, а оние на Nasdaq 100 пораснаа за 0,9 отсто, откако на крајот на вчерашната седница пазарите изгледа успеаја да се спасат од падови, кога индексите отстапија од рекордните нивоа по упадот на толпата во Капитол.
Азискиот индекс MSCI се зголеми за 0,8 проценти, што е близу до нов рекорд. Растот беше предводен од 2,6% пораст на јужнокорејскиот индекс Kospi и 1,8% пораст на австралискиот ASX 200.
Јапонскиот Nikkei додаде 2%, искачувајќи се на највисоко ниво од 1990 година. FTSE и европските фјучерси благо пораснаа.
Вчерашната продажба на државни обврзници го зголеми 10-годишниот принос на акциите на повеќе од 1% за прв пат од март. Денес достигна 1,0507%.
Американскиот долар исто така поевтини по објавувањето на резултатите од изборите, бидејќи трговците сметаат дека големиот и растечки трговски и буџетски дефицит на САД ќе тежи повеќе од доларот.
Вчера доларот падна на речиси тримесечно најниско ниво во однос на еврото на 1,2349 и денес се тргуваше близу до тоа ниво. Американската валута исто така се намали на повеќегодишни падови во однос на австралискиот и новозеландскиот долар и швајцарскиот франк.
Растот на американската берза вчера беше ограничен од продажбата на акции на технолошки компании, бидејќи инвеститорите очекуваат на секторот да му се воведат повисоки даноци и регулативи, како и поради демонстрантите кои упаднаа во Конгресот за да спречат потврда на изборната загуба на Доналд Трамп.
Индексите на САД се повлекоа од највисоките нивоа за еден ден откако полицијата ги евакуираше пратениците и помина повеќе од три часа обидувајќи се да ги отстрани приврзаниците на Трамп.
Конгресот потоа ја продолжи својата работа. Акциите на Твитер паднаа малку откако социјалните медиуми објавија дека привремено ја заклучиле сметката на Трамп за кршење на правилата за користење на платформата.
Во меѓувреме, се чини дека мерките против кинеските компании се интензивираат, а извори на Ројтерс велат дека администрацијата на Трамп размислува да ја прошири забраната за инвестиции на технолошките гиганти Alibaba и Tencent.
Акциите на обете компании паднаа повеќе од 4% на берзата во Хонг Конг, а нагло паднаа и акциите на трите кинески телекоми, кои њујоршката берза на крајот реши да ги отпише.
Цените на нафтата беа близу до 10-месечните највисоки вредности откако Саудиска Арабија вети дека ќе го намали производството. Фјучерсите на суровата нафта „брент“ пораснаа за 0,7 отсто, на 54,69 долари за барел, додека лесната нафта во САД порасна за 0,9 отсто, на 51,07 долари за барел.
Цената на златото остана непроменета на 1.917 долари за унца, а биткоинот ја задржа својата позиција откако се искачи на нов рекорд од 37.785 долари.