Минатата година, една милијарда туристи помалку ја посетиле Европа отколку во 2019 година, што е пад од 61%, покажа извештајот на Европската комисија за патувања (ЕТЦ) за третиот квартал од минатата година.
Пандемијата на коронавирус го прекина периодот на подем на европскиот туризам и владите побрзаа да помогнат, разгледувајќи решенија што можат да ја намалат зависноста од приходите од доаѓањето на странски гости, пренесе Б92.
На својот врв, во 2018 година, туризмот учествуваше со 10 проценти во бруто домашниот производ на Европа (БДП) и вработи 11 проценти од работниците. Повеќе од половина од глобалниот туризам беше реализиран во Европа, објави Комисијата во својот годишен извештај.
Растот продолжи и во 2019 година, иако со побавно темпо, соопштија ЕТЦ, посочувајќи на „разнишаната“ светска економија, американско-кинеските трговски конфликти и стравот од Брегзит без договор.
На почетокот на минатата година, коронавирусот започна да се шири низ целиот свет и работите се променија. Освен во здравствениот сектор, неговиот разорувачки ефект тешко се почувствува во секторот за патувања и туризам.
Во извештајот за третиот квартал од минатата година, ЕТЦ процени дека една милијарда туристи помалку ја посетиле Европа минатата година отколку во 2019 година, што би претставувало пад од 61 процент.
Губењето на приходите од туризам го забележаа сите земји на Стариот континент, но најмногу ги погоди оние кои најмногу зависат од него, Хрватска и Грција.
Туризмот претставува повеќе од една петтина од БДП на двете земји, кој забележа вртоглав пад на приходите во секторот оваа година.