Приходите од најпознатите хотели на поранешниот американски претседател Доналд Трамп паднаа минатата година, кога пандемијата на коронавирусот силно ја погоди економијата, според финансискиот извештај објавен во средата, последниот ден од неговиот мандат.
„Интернационалниот хотел“ на Трамп во Вашингтон заработи 15,1 милиони долари во 2020 година и во првите три недели од 2021 година, покажува извештајот на Трамп. Тоа е 62,7 проценти помалку отколку во 2019 година.
Слично е и со недвижниот имот на Трамп во Лас Вегас, чиј приход опадна 60,5 проценти на 9,2 милиони и со неговиот терен за голф во Флорида, „Трамп Нешнл Дорал“, чиј приход е 42,7 проценти помал и изнесува 44,2 милиони долари.
„Мар-а-Лаго“ во плус
Ретка светла точка е клубот „Мар-а-Лаго“ во Палм Бич, Флорида, каде што Трамп ќе живее откако го напушти Вашингтон. Приходите од тоа одморалиште, во кое Трамп повремено примаше политички сојузници и странски гости, скокнаа за 13% минатата година на 24,2 милиони долари.
Редовниот финансиски извештај што Трамп требаше да го пополни нуди еден од најкомплетните увиди во финансиите на милијардерот за недвижнини кој упорно одбиваше да ги објавува своите даночни пријави, и покрај фактот дека тоа беше вообичаена пракса на претходните претседатели.
Треба да врати пет кредити
Во извештајот на 79 страници се наведени детали за неговиот удел во компаниите за тоа колку пари добил како член на Screen Actors Guild, здружение на филмски и телевизиски работници и изведувачи.
Вклучува и подароци што Трамп ги добил како претседател, вклучително и УФЦ појас од 650 долари, кој го доби од Колби Ковингтон, борец и приврзаник на Трамп.
Извештајот ги содржи и обврските на компаниите на Трамп, вклучително и 5 заеми, од кои секој вреди најмалку 50 милиони долари. Повеќето од нив созреваат во следните четири години.