Производителот на електрични возила „Тесла“ со седиште во Калифорнија има стекнато биткоини во вредност од 1,5 милијарди долари како дел од политиката за инвестиции на компанијата предводена од Елон Маск и планира наскоро да прифаќа исплата во дигитални валути за набавка на возилото.
Компанијата рано утрово ја претстави новата стратегија во извештајот до Комисијата за хартии од вредност на САД, наведувајќи дека нејзините инвестиции во дигитални валути и други „алтернативни резервни средства“ можат да растат.
Вредноста на биткоинот скокна 14 проценти и се чинеше дека за кратко достигна рекордно високо ниво. Акциите на Тесла, исто така, забележаа раст.
Во извештајот за резултатите од четвртиот квартал, објавен минатиот месец, компанијата Тесла објави дека има готовина и еквиваленти од 19,4 милијарди долари.