Како што се очекуваше, многу луѓе се потпираат на апликациите за виртуелни состаноци за да го одржат работниот тек, притоа продолжувајќи ги ограничувачките мерки заради пандемијата. Ова ги тера самите развивачи на апликации да го развиваат својот производ побрзо и да додаваат нови опции за нив. Една од најактивните платформи е Google Meet, а сега има уште една нова верзија, пренесува Phonearena.
Главниот фокус на ажурирањето овој пат е да се олесни создавањето виртуелни состаноци. Со кликнување на копчето „New meeting” ќе имате избор од три опции – состанок за подоцнежен датум, инстант состанок или закажување состанок преку Google Calendar.
Ако ја изберете третата опција, ќе треба да го отворите Календарот во ново јазиче и да создадете настан со состанокот, а податоците ќе се пополнат автоматски. Корисниците ќе добијат покани да се приклучат на состанокот во соодветниот ден и време.
Ажурирањето сега се дистрибуира до корисниците. Сепак, ова се случува во фази и може да потрае и до 15 дена за да се појави кај сите. Функциите ќе бидат достапни и за крајните корисници и за деловните клиенти на компанијата и се бесплатни.