Заменикот на претседателот на Владата задолжен за економски прашања, координација на економските ресори и инвестиции, Фатмир Битиќи, министерот за економија, Крешник Бектеши, директорите на Агенцијата за странски инвестиции и промоција на извозот, Дејан Павлески и на Дирекцијата за технолошко индустриските развојни зони, Јован Деспотовски, вчера вечер, заедно со членовите на работната група, одржаа состанок на кој се дискутираше за измените и дополните на Законот за финансиска поддршка на инвестиции.
Законот за финансиска поддршка на инвестиции, како дел од Планот за економски раст, кој почна да се применува од 2018 година, е важен за поттикнување на економскиот раст и развој на државата, преку поддршка на инвестициите за зголемување на конкурентноста на економијата и развојот на пазарот на трудот преку поддршка на вработувањата.
Со овој Закон се уредуваат видовите, висината, условите, начинот и постапката за доделување на финансиска поддршка на инвестициите на деловните субјекти кои ќе инвестираат во Република Северна Македонијa и претставува шема на помош согласно прописите за контрола на државна помош.
На оваа работна средба започнаа дискусиите за измени и дополни на дел од условите и критериумите за аплицирање за нови договори и исплата на веќе постоечките договори во услови на ковид криза. Ова е една од мерките од Петтиот пакет економски мерки, со која дополнително ќе се излезе во пресрет на барањата на стопанството, за олеснување на критериумите за аплицирање и добивање на соодветна државна помош за сите компании, домашни и странски, микро, мали, средни и големи, кои решиле да инвестираат во нови производствени хали, набавка на машини, алати и други основни средства за производство, но и да реализираат нови вработувања или дополнителни обуки за вработените дури и во услови на криза.
Со измените и дополните во Законот за финансиска поддршка на инвестиции, како мерка од петтиот пакет, ќе се олеснат условите за 245 компании кои имаат активни договори, а особено за потенцијално новите компании, кои инвестирале во 2020 година или ќе инвестираат во 2021 година, според Законот за финансиска поддршка на инвестиции. Планираните измени и дополни се прават, за да се излезе во пресрет на стопанството и на граѓаните, со што Владата уште еднаш го покажува својот отворен и партнерски пристап во креирањето на новата развојна економија на Северна Македонија, за побрз и одржлив економски раст.