Во екот на скандалот со групата „Јавна соба“ на апликацијата Телеграм, се поставува прашањето дали поимот безбедна комуникација на интернет воопшто постои и што можеме ние да направиме самите за да се заштитиме од хакерски напади и злоупотреби?
Најкомерцијалните апликации, како што се Фејсбук месинџер, Скајп или Снепчет, колку и да ни се чинат како безбедни, скандалот со Кембриџ аналитика и податоците на корисниците ни покажа дека не е така.
Често, поради професионална и безбедна комуникација, се појавува потребата од користење на некомерцијални комуникациски апликации, а токму Телеграм важи за една од таквите.
Според самиот опис на апликацијата, наведен од Телеграм, се работи за „чет“ со безбедна „end-to-end“ енкрипција на податоците, која е различна од клауд-верзиите кои се најпристапни за девелоперите, но и за хакерите и оние кои сакаат да злоупотребат податоци. Телеграм нуди и опција да го споделите својот контакт без телефонски број, туку само со корисничко име, може да се вклучи двојна автентикација, нуди опција за тајни разговори, но и за нивно самоуништување по одреден временски период, кој корисникот самиот го избира од понудените опции.
Телеграм е доста популарен начин на комуникација поврзана со работата, со споделување доверливи податоци меѓу соработници или клиенти и корисници, но секако, како и сè останато на интернет, опцијата за злоупотребување постои и не е исклучена.
Иако „end-to-end“ енкрипцијата не гарантира целосна заштита од шпионирање, сајбер-криминал и други злоупотреби, може да се каже дека целиот „пакет“ на податоци го прави помалку подложен на овие напади.
Воцап (WhatsApp)
Покрај Телеграм, апликации кои функционираат на сличен или ист начин се и Воцап (WhatsApp), но довербата во оваа алатка опадна по сканалот со злоупотребата на податоци на корисници од страна на Фејсбук. Сепак, е доста побезбеден избор од Месинџер или Скајп. Достапна е и за Андроид и за iOS.
Вајбер (Viber)
Популарниот Вајбер (Viber) од 2017 година наваму исто така нуди побезбедна комуникација меѓу корисниците, го имплементираа и истиот „end-to-end“ систем на енкрипција, а постои и опцијата за тајни разговори и самоуништување на содржини. Вајбер има над 900 милиони активни корисници. Достапна е и за Андроид и за iOS.
Лајн (LINE)
Исто популарна апликација, но не толку позната кај нас, е и јапонската LINE која била направена од тим од јапонски инженери, во 2011 година кога силен земјотрес го погоди Тохоку. Тогаш биле уништени многу базни станици и телекомуникациска инфраструктура, па бил најден алтернативен начин на комуникација. Од 2017 и LINE ја имплементира „end-to-end“ енкрипцијата. Достапна е и за Андроид и за iOS.
КакаоТок (KakaoTalk)
KakaoTalk е слична како и претходно наведените апликации, со тоа што ако сакате да користите „end-to-end“ енкриптирана комуникација, тоа го избирате рачно од менито на поставки. Апликацијата е популарна во Јужна Кореја. Достапна е и за Андроид и за iOS.
Сигнал (Signal)
Апликацијата Сигнал (Signal) е во сопственост на Whisper Systems, чија врвна цел е заштитена и безбедна комуникација, а меѓу познатите корисници на апликацијата е и Едвард Сноуден. Сигнал има дифолтна „end-to-end“ енкрипција, едноставна е, нема стикери, нема емоџи и работи на секој мобилен телефон. Достапна е и за Андроид и за iOS.
Постојат и други апликации со слична функционалност. Можете да ти пронајдете ТУКА.